நாட்டின் முதல் குடிமகளுக்கு 'நோ' சொன்ன மம்தா? - ஒரு துளி கண்ணீரும், ஓராயிரம் கேள்விகளும் - சிலிகுரியில் நடந்ததென்ன?

 By Seetha Mar 8, 2026, 16:53 IST
ஜனாதிபதி திரெளபதி ஜனாதிபதி திரெளபதி

மேற்கு வங்க மாநிலம் டார்ஜிலிங்கில் நடைபெற்ற சர்வதேச சந்தால் மாநாட்டின் போது, இந்தியக் குடியரசுத் தலைவர் திரௌபதி முர்மு அவர்களை அம்மாநில அரசு நடத்திய விதம் மற்றும் நெறிமுறை மீறல்கள் தொடர்பாக நாடு முழுவதும் அரசியல் புயல் அனல் வீசுகிறது. 

இந்தியாவின் முதல் பழங்குடியின பெண் குடியரசுத் தலைவர் திரௌபதி முர்மு, நேற்றும், இன்றும் மேற்கு வங்கத்தின் டார்ஜிலிங் மற்றும் சிலிகுரி பகுதிகளில் சுற்றுப்பயணம் மேற்கொண்டார். ஒரு நாட்டின் மிக உயரிய பதவியில் இருப்பவர் மேற்கொள்ளும் சாதாரண அரசு முறைப்பயணம், தற்போது ஆளும் திரிணாமுல் காங்கிரஸ் மற்றும் பாஜக இடையே ஒரு மிகப்பெரிய அரசியல் யுத்தமாக உருவெடுத்துள்ளது.


சர்ச்சையின் தொடக்கம்: இடமாற்றம் மற்றும் அணுகல்தன்மை

சர்வதேச சந்தால் மாநாடு முதலில் டார்ஜிலிங் மாவட்டத்தின் பிதான்நகரில் மிகப்பிரம்மாண்டமாக நடத்தத் திட்டமிடப்பட்டிருந்தது. ஆனால், கடைசி நேரத்தில் மேற்கு வங்க அரசு எவ்வித முன்னறிவிப்புமின்றி இந்த இடத்தை மாற்றி, சிலிகுரியின் புறநகர்ப் பகுதியான பாக்டோக்ராவில் உள்ள கோசைன்பூர் என்ற இடத்திற்கு மாற்றியது.

இந்த இடமாற்றம் ஒரு சாதாரண நிர்வாக நடவடிக்கை என்பதைத் தாண்டி, பழங்குடியின மக்களின் உணர்வுகளைப் புண்படுத்தும் செயலாக மாறியது. இந்நிகழ்ச்சியில் பேசிய குடியரசுத் தலைவர் முர்மு, வழக்கத்திற்கு மாறாகத் தனது வருத்தத்தைப் பகிரங்கமாகப் பதிவு செய்தார். "இந்த இடமாற்றத்தால் சந்தால் சமூகத்தைச் சேர்ந்த பலரால் இங்கு வர முடியவில்லை. அருகிலுள்ள பரந்த திறந்தவெளி மைதானங்களில் இந்த விழாவை நடத்தியிருந்தால், குறைந்தது ஐந்து லட்சம் மக்கள் தங்களது கலாச்சாரக் கொண்டாட்டத்தில் எளிதாகப் பங்கேற்றிருக்க முடியும்" என்று அவர் சுட்டிக்காட்டினார். நிகழ்ச்சி நடந்த இடம் குறுகலாக இருந்ததால், தொலைதூரத்திலிருந்து வந்த பழங்குடியின மக்கள் ஏமாற்றத்துடன் திரும்பியதை அவர் வேதனையுடன் குறிப்பிட்டார்.


நெறிமுறை மீறல்: முதல்வர் மம்தா எங்கே?

இந்தியக் குடியரசுத் தலைவர் ஒரு மாநிலத்திற்கு வரும்போது, அந்த மாநிலத்தின் முதலமைச்சர், தலைமைச் செயலாளர் மற்றும் காவல்துறை இயக்குநர் ஜெனரல் ஆகியோர் நேரில் வந்து வரவேற்பது நீண்டகாலமாகப் பின்பற்றப்படும் அதிகாரப்பூர்வ நெறிமுறை ஆகும். ஆனால், சிலிகுரி விமான நிலையத்தில் குடியரசுத் தலைவரை வரவேற்க முதல்வர் மம்தா பானர்ஜியோ அல்லது மாநில அமைச்சர்களோ வரவில்லை. சிலிகுரி மேயர் கௌதம் தேப் மற்றும் மாவட்ட அதிகாரிகள் மட்டுமே அங்கு இருந்தனர்.

இது குறித்துத் தனது உரையில் குறிப்பிட்ட முர்மு, "ஒரு மாநிலத்திற்கு ஜனாதிபதி வரும்போது முதலமைச்சரும் அமைச்சர்களும் இருக்க வேண்டும் என்பது மரபு. மம்தா பானர்ஜி எனது தங்கை போன்றவர். அவர் ஏன் வரவில்லை? என் மீது அவருக்கு என்ன கோபம் என்று தெரியவில்லை" என உணர்ச்சிவசப்பட்டுக் குறிப்பிட்டார். தன்னை 'வங்காளத்தின் மகள்' என்று கருதுவதாகவும் அவர் உருக்கமாகப் பேசினார்.

தேசிய அளவில் வெடித்த அரசியல் புயல்

இந்தச் சம்பவம் வெளியான சில மணி நேரங்களிலேயே பிரதமர் நரேந்திர மோடி மற்றும் மத்திய அமைச்சர்கள் கடும் கண்டனங்களைத் தெரிவித்தனர். பிரதமர் மோடி தனது எக்ஸ் தளத்தில், திரிணாமுல் காங்கிரஸின் ஆணவம் விரைவில் உடைந்து விடும் என்றும், நாட்டின் முதல் குடிமகளையும் பழங்குடியின சமூகத்தையும் அவமதிப்பது வெட்கக்கேடானது என்றும் பதிவிட்டுள்ளார். "இது ஒட்டுமொத்த நாட்டு மக்களையும், குறிப்பாகத் தன்னாட்சி மற்றும் ஜனநாயகத்தின் மீது நம்பிக்கை கொண்டவர்களையும் வேதனைப்படுத்தியுள்ளது" என்று அவர் சாடியுள்ளார்.

பாஜகவின் தேசியத் தலைவர்கள், மம்தா பானர்ஜி வேண்டுமென்றே ஒரு பழங்குடியினப் பெண்ணை அவமதிக்கிறார் என்றும், இது கூட்டாட்சித் தத்துவத்திற்கு விடப்பட்ட மிகப்பெரிய சவால் என்றும் விமர்சித்து வருகின்றனர்.


மம்தா பானர்ஜியின் விளக்கம்

திரிணாமுல் காங்கிரஸ் மற்றும் முதல்வர் மம்தா பானர்ஜி இந்தக் குற்றச்சாட்டுகளைத் திட்டவட்டமாக மறுத்துள்ளனர். ஜனாதிபதி செயலகத்தால் அங்கீகரிக்கப்பட்ட வரவேற்புப் பட்டியலின்படியே அனைத்து ஏற்பாடுகளும் செய்யப்பட்டதாக மம்தா தெரிவித்தார். மாநாட்டு இடமாற்றம் என்பது நிர்வாக ரீதியானது என்றும், அதற்கு ஏற்பாட்டாளர்களின் போதிய தயார்நிலையின்மையே காரணம் என்றும் அவர் விளக்கமளித்தார். மேலும், வரவிருக்கும் தேர்தல்களைக் கருத்தில் கொண்டு பாஜக ஜனாதிபதி அலுவலகத்தை அரசியல் மயமாக்குவதாக அவர் குற்றம் சாட்டினார்.

திரெளபதி

மத்திய அரசின் அதிரடி நடவடிக்கை

இந்த விவகாரத்தைத் தனிப்பட்ட முறையில் கவனித்த மத்திய உள்துறை அமைச்சகம், தற்போது மேற்கு வங்க அரசுக்குக் கடுமையான உத்தரவைப் பிறப்பித்துள்ளது. இன்று மாலை 5 மணிக்குள் ஜனாதிபதி வருகையின் போது ஏற்பட்ட பாதுகாப்பு குறைபாடுகள் மற்றும் நெறிமுறை மீறல்கள் குறித்து விரிவான அறிக்கை அளிக்க மாநில தலைமைச் செயலாளருக்கு உத்தரவிடப்பட்டுள்ளது. குறிப்பாக, முதலமைச்சர் மற்றும் டிஜிபி ஏன் வரவேற்பு நிகழ்வில் இல்லை? கடைசி நேரத்தில் மாநாட்டு இடத்தை மாற்றியது ஏன்? பயணப் பாதையில் பாதுகாப்பு குளறுபடிகள் ஏன் ஏற்பட்டன? போன்ற கேள்விகளுக்கு விளக்கம் கேட்கப்பட்டுள்ளது. இது தொடர்பாக டார்ஜிலிங் மாவட்ட ஆட்சியர் மற்றும் சிலிகுரி காவல் ஆணையர் மீது என்ன நடவடிக்கை எடுக்கப்பட்டுள்ளது என்பதையும் மத்திய அரசு அறிக்கையாகக் கோரியுள்ளது.

மேற்கு வங்கத்தில் ஆளுநருக்கும் மாநில அரசுக்கும் ஏற்கனவே மோதல் நிலவி வரும் சூழலில், தற்போது நேரடியாகக் குடியரசுத் தலைவருடனான இந்த மோதல், டெல்லி மற்றும் கொல்கத்தா இடையிலான உறவை மேலும் விரிசலடையச் செய்துள்ளது. 2026 சட்டமன்றத் தேர்தலை நோக்கிய அரசியல் நகர்வுகளில், பழங்குடியின மக்களின் வாக்குகள் மிக முக்கியமாகப் பார்க்கப்படும் நிலையில், இந்தச் சம்பவம் அம்மாநில அரசியலில் ஒரு மிகப்பெரிய திருப்புமுனையாக அமையும் என எதிர்பார்க்கப்படுகிறது.