மம்தா - சுவேந்து மோதலால் பரபரப்பு.. மேற்கு வங்கத்தில் 3 மணி நிலவரப்படி 78.68% வாக்குகள் பதிவு!

மேற்கு வங்கத்தில் இரண்டாம் கட்டமாக 142 தொகுதிகளில் இன்று வாக்குப்பதிவு நடைபெற்று வருகிறது. காலை முதலே மக்கள் நீண்ட வரிசையில் நின்று ஆர்வத்துடன் வாக்களித்து வருகின்றனர்.

தேர்தல் ஆணையத்தின் அதிகாரப்பூர்வ அறிவிப்பின்படி, ஒட்டுமொத்தமாக 78.68% வாக்குகள் பதிவாகியுள்ளன. மாவட்ட வாரியாகப் பதிவான வாக்குகளின் விவரங்கள். பூர்வ வர்த்தமான்: 83.11% (அதிகபட்சம்), ஹூக்ளி: 80.77%, நாடியா: 79.79%, ஹவுரா: 78.68%, வட கொல்கத்தா: 78.00%, தெற்கு கொல்கத்தா: 75.38%

இந்தத் தேர்தலின் மிக முக்கியமான தொகுதியாகக் கருதப்படும் பவானிபூரில் முதல்வர் மம்தா பானர்ஜியும், பாஜக-வின் சுவேந்து அதிகாரியும் ஒரே வாக்குச்சாவடிப் பகுதியில் நேருக்கு நேர் சந்தித்தபோது பெரும் பதற்றம் நிலவியது.

"மத்திய பாதுகாப்புப் படைகள் பாஜக-விற்கு ஆதரவாகச் செயல்படுகின்றன; திரிணாமுல் காங்கிரஸ் முகவர்களைச் சில இடங்களில் அனுமதிக்கவில்லை" என மம்தா பானர்ஜி குற்றம் சாட்டினார். மம்தா பானர்ஜியின் குற்றச்சாட்டுகள் தோல்வி பயத்தினால் கூறப்படுபவை எனச் சுவேந்து அதிகாரி விமர்சித்துள்ளார்.

நாடியா மாவட்டத்தின் சாப்ரா பகுதியில் பாஜக முகவர் தாக்கப்பட்டதாகவும், பாங்கர் பகுதியில் ஐஎஸ்எஃப் (ISF) முகவர்களுக்கு அச்சுறுத்தல் விடுக்கப்பட்டதாகவும் புகார்கள் எழுந்துள்ளன. ஹவுராவின் பலி பகுதியில் வாக்குப்பதிவு இயந்திரக் கோளாறால் வாக்குப்பதிவு சற்றுத் தாமதமானது. இருப்பினும், மத்தியப் படைகளின் பலத்த பாதுகாப்புடன் தேர்தல் தொடர்ந்து நடைபெற்று வருகிறது.

142 தொகுதிகளில் மொத்தம் 1,448 வேட்பாளர்கள் களத்தில் உள்ளனர். சுமார் 3.21 கோடி வாக்காளர்கள் இன்று வாக்களிக்கத் தகுதி பெற்றுள்ளனர். இதில் 8,000-க்கும் மேற்பட்ட வாக்குச்சாவடிகள் பெண்களால் மட்டுமே நிர்வகிக்கப்படுவது குறிப்பிடத்தக்கது.