ஒரே நாளில் 6 பேரை கொன்ற கொலையாளி விஷம் குடித்து தற்கொலை!

தெலுங்கானா மாநிலம் ரங்காரெட்டி மாவட்டம் கொத்தூர் மண்டலப் பகுதியில் உள்ள ஒரு காலி இடத்தில், மர்ம நபர் ஒருவரின் உடல் கிடப்பதாக உள்ளூர் போலீசாருக்குத் தகவல் கிடைத்தது. அந்தத் தகவலின் பேரில் சம்பவ இடத்திற்கு விரைந்து சென்ற போலீசார், அங்கே இறந்து கிடந்த நபரின் உடலைக் கைப்பற்றித் தீவிர விசாரணை நடத்தினர்.

போலீசார் நடத்திய விசாரணையில், இறந்து கிடந்தவர் தைவாலகூடா பகுதியில் வசித்து வருபவர்  ராஜ்குமார் என்பது முறைப்படி உறுதி செய்யப்பட்டது. இவர் மீது ஏற்கனவே 17 வயது சிறுமியைத் துன்புறுத்தியதாகப் போக்சோ சட்டத்தின் கீழ் வழக்குப் பதிவு செய்யப்பட்டிருந்தது. அந்த ஆத்திரத்தில் அச்சிறுமியின் தாய், ஒரு மூதாட்டி மற்றும் அந்தச் சிறுமியை ஏரிப் பகுதிக்குக் கடத்திச் சென்று கொடூரமாகக் கொலை செய்துள்ளார்.

அதன் பின்னர்த் தனது வீட்டுக்குச் சென்ற ராஜ்குமார், தனது மனைவி சரிதா மற்றும் 2 மகன்களையும் கத்தியால் குத்திக் கொலை செய்து தப்பியோடினார். இவ்வாறு ஒரே நாளில் 6 பேரைத் தீர்த்துக் கட்டிய இவரைக் காவல் துறையினர் தீவிரமாகத் தேடி வந்தனர். தற்போது அவரது உடல் அருகே நச்சுப் பாட்டில் கிடந்ததால், அவர் பயந்து போய் விஷம் குடித்துத் தற்கொலை செய்திருக்கலாம் என்ற கோணத்தில் போலீசார் விசாரணையைத் தொடர்கின்றனர்.