மொபைல் வாங்குவது போல் நடித்து செல்போன் கடையில் இளம்பெண் ஐ-போன் திருட்டு... பரபரப்பு வீடியோ!
கோவை காந்திபுரம் பகுதியில் அமைந்துள்ள செல்போன் கடை ஒன்றுக்கு வந்த இளம்பெண் ஒருவர், புதிதாக மொபைல் வாங்குவது போல் நடித்து அங்கிருந்து விலைமதிப்ப்பற்ற ஐ-போனைத் திருடிச் சென்றுள்ளார். கடையில் இருந்த விற்பனையாளர்கள் மற்றும் மற்றவர்களின் கவனத்தைத் தந்திரமாகத் திசை திருப்பிவிட்டு அந்தப் பெண் மிகச் சாதுரியமாகச் செல்போனைத் தூக்கிச் சென்றுள்ளார். வாடிக்கையாளர் போன்று வந்து கைவரிசை காட்டிய இந்தத் திருட்டுச் சம்பவம் குறித்த புகாரைக் கடை உரிமையாளர் உடனடியாகக் காவல் நிலையத்தில் அளித்துள்ளார்.
தகவலறிந்த காவல்துறையினர் சம்பவ இடத்திற்கு விரைந்து சென்று கடையில் பதிவாகியிருந்த சிசிடிவி காட்சிகளை முழுமையாகக் கைப்பற்றிச் சோதனை நடத்தி வருகின்றனர். அந்தப் பெண்ணின் முக அடையாளங்கள் மற்றும் அவர் தப்பிச் சென்ற வழித்தடங்கள் குறித்துத் தீவிரமாக ஆராய்ந்து வருவதாகக் காவல்துறை அதிகாரிகள் தெரிவித்துள்ளனர். வணிக நிறுவனங்களுக்குத் தொடர்ச்சியாக வந்து இதுபோன்று கைவரிசை காட்டும் மர்ம நபர்களைப் பிடிக்கத் தனிப்படைகள் அமைக்கப்பட்டுத் தேடுதல் வேட்டை தீவிரப்படுத்தப்பட்டுள்ளது.
பொதுமக்கள் அதிகம் கூடும் வணிக வளாகங்கள் மற்றும் கடைகளில் இதுபோன்ற குற்றச் செயல்கள் அதிகரித்து வருவது வியாபாரிகள் மத்தியில் அச்சத்தை ஏற்படுத்தியுள்ளது. கடைகளுக்கு வரும் வாடிக்கையாளர்களைக் கண்காணிக்கப் பாதுகாப்பு ஏற்பாடுகளை மேலும் பலப்படுத்த வேண்டும் என்று பலரும் கோரிக்கை விடுத்து வருகின்றனர். சிசிடிவி காட்சிகளின் அடிப்படையில் விசாரணை நடைபெற்று வருவதால் குற்றவாளி விரைவில் கைது செய்யப்படுவார் என எதிர்பார்க்கப்படுகிறது.