625 அடி உயரத்திற்குத் தீப்பிழம்பைக் கக்கும் கிலாவியா எரிமலை: ஹவாய் தீவில் உச்சக்கட்ட எச்சரிக்கை!

அமெரிக்காவின் ஹவாய் தீவில் அமைந்துள்ள உலகப்புகழ் பெற்ற கிலாவியா எரிமலை, தற்போது மீண்டும் தனது விஸ்வரூபத்தைக் காட்டத் தொடங்கியுள்ளது. சுமார் 625 அடி உயரத்திற்கு நெருப்புக் குழம்பை வானை நோக்கிச் சீறிப் பாயச் செய்து வரும் இந்த எரிமலையின் செயல்பாடு, அந்தப் பகுதியில் பெரும் பரபரப்பை ஏற்படுத்தியுள்ளது.

அமெரிக்க நிலப்பரப்பில் இருந்து சுமார் 2,000 மைல் தொலைவில் பசிபிக் பெருங்கடலில் அமைந்துள்ள ஹவாய் தீவு, எரிமலைகளின் பிறப்பிடமாகக் கருதப்படுகிறது. இங்குள்ள ஐந்து பெரிய எரிமலைகளில் மிகவும் சுறுசுறுப்பானது 'கிலாவியா' (Kilauea) ஆகும். 4,000 அடி உயரம் கொண்ட இந்த எரிமலை, கடந்த 1983-ஆம் ஆண்டு முதல் தொடர்ந்து லாவா எனப்படும் எரிமலைக் குழம்பை வெளியேற்றி வருகிறது.

கடந்த ஒன்றரை ஆண்டுகளாக அமைதியாகக் கனன்று கொண்டிருந்த கிலாவியா, தற்போது மீண்டும் வெடிக்கத் தொடங்கியுள்ளது. எரிமலையின் வாயிலிருந்து சுமார் 625 அடி உயரத்திற்கு (அதாவது சுமார் 60 மாடி கட்டிடம் உயரத்திற்கு) பிரம்மாண்டமான நெருப்புப் பிழம்புகள் பீறிட்டு வருகின்றன. 1983-க்குப் பிறகு இது 44-வது முறையாகப் பெரிய அளவில் நெருப்புக் குழம்பை வெளியேற்றுவதாக அமெரிக்கப் புவியியல் ஆய்வு மையம் தெரிவித்துள்ளது.

எரிமலை வெடிப்பைத் தொடர்ந்து அந்தப் பகுதி முழுவதும் அடர்ந்த சாம்பல் படலமும், கந்தக டை ஆக்சைடு போன்ற நச்சு வாயுக்களும் பரவி வருகின்றன.

எரிமலையிலிருந்து வெளியேறும் சாம்பல் சுவாசப் பிரச்சினைகளை ஏற்படுத்தக்கூடும் என்பதால், அப்பகுதி மக்கள் மற்றும் சுற்றுலாப் பயணிகள் முகக்கவசம் அணியவும், பாதுகாப்பான இடங்களுக்குச் செல்லவும் எச்சரிக்கை விடுக்கப்பட்டுள்ளது. வான்பரப்பில் சாம்பல் துகள்கள் கலந்துள்ளதால், அந்தப் பகுதியில் விமானப் போக்குவரத்திற்கும் கட்டுப்பாடுகள் விதிக்கப்பட வாய்ப்புள்ளது.

இந்த இயற்கை அதிசயத்தை நேரில் காணப் பாதுகாப்பு தூரத்திலிருந்து ஆயிரக்கணக்கான சுற்றுலாப் பயணிகள் ஹவாய் தீவில் குவிந்து வருகின்றனர். இருப்பினும், காற்றின் திசை மாறுவதால் நச்சு வாயுக்கள் குடியிருப்புப் பகுதிகளுக்குள் நுழையக்கூடும் என்பதால் உள்ளூர் நிர்வாகம் தீவிரக் கண்காணிப்பில் ஈடுபட்டுள்ளது.