மும்பையில் 6-வது மாடியில் இருந்து குழந்தையைத் தள்ளிய 10 வயது சிறுமி? சிசிடிவி காட்சியால் அதிர்ச்சி
மும்பையில் அடுக்குமாடி குடியிருப்பின் 6-வது மாடியில் இருந்து ஒன்றரை வயது பெண் குழந்தை கீழே விழுந்து உயிரிழந்த சம்பவத்தில், அதே குடியிருப்பில் வசிக்கும் 10 வயது சிறுமி குழந்தையைத் தள்ளியதாகக் கூறப்படும் சிசிடிவி காட்சிகள் வெளியாகி பரபரப்பை ஏற்படுத்தியுள்ளன.
சிசிடிவி காட்சியில் பதிவான சம்பவம்
மும்பை கோரேகாவ் கிழக்கு பகுதியில் உள்ள சிவ்ஷாஹி அடுக்குமாடி குடியிருப்பில் இந்தச் சம்பவம் நடந்துள்ளது. குழந்தை உயிரிழந்தது குறித்து விசாரணை நடத்திய போலீசார், அங்கிருந்த கண்காணிப்பு கேமரா காட்சிகளை ஆய்வு செய்தனர். அதில், 10 வயது சிறுமி குழந்தையைத் தூக்கி, 6-வது மாடியில் உள்ள திறந்தவெளித் துவாரம் வழியாகக் கீழே தள்ளியதாகத் தெரிகிறது.
குடும்பத்தினர் மீது புகார்; போலீசார் விசாரணை
உயிரிழந்த குழந்தையின் பெற்றோர், சம்பவத்துக்கான ஆதாரங்களை மறைக்கும் நோக்கில் சிறுமியின் குடும்பத்தினர் கண்காணிப்பு கேமராக்களை அணைத்ததாகப் புகார் அளித்துள்ளனர். இந்தக் குற்றச்சாட்டு குறித்தும் போலீசார் விசாரணை நடத்தி வருகின்றனர். சிறுமி மற்றும் அவரது பெற்றோர், உறவினர்களிடம் விசாரணை நடைபெற்று வரும் நிலையில், சம்பவத்தின் முழுப் பின்னணி குறித்து அதிகாரப்பூர்வ விசாரணைக்குப் பிறகே தெளிவு கிடைக்கும்.