உத்தரப் பிரதேச மாநிலம் முசாபர்நகரில் உள்ள பேக்ராஜ்பூர் மருத்துவக் கல்லூரி விடுதியில், 24 வயது எம்பிபிஎஸ் இறுதியாண்டு மாணவி ஷகுன் சைனி உயிரிழந்த நிலையில் மீட்கப்பட்டார். ஹரியானாவின் கைத்தல் மாவட்டத்தைச் சேர்ந்த அவர், திங்கள்கிழமை நள்ளிரவில் அறையில் தூக்கிட்டுத் தற்கொலை செய்துகொண்டதாக முதற்கட்ட தகவல்கள் தெரிவிக்கின்றன.

அறையைத் திறக்காததால் சந்தேகம்

நீண்ட நேரமாக அறை திறக்கப்படாததால் சந்தேகமடைந்த விடுதி ஊழியர்கள் போலீசாருக்குத் தகவல் தெரிவித்தனர். அங்கு வந்த போலீசார் கதவை உடைத்து உள்ளே சென்றபோது மாணவி உயிரிழந்த நிலையில் இருந்ததாகக் கூறப்படுகிறது. உடல் பிரேதப் பரிசோதனைக்காக அனுப்பி வைக்கப்பட்டது.

மரணத்துக்கான காரணம் குறித்து விசாரணை

சம்பவ இடத்தில் தற்கொலைக் குறிப்பு எதுவும் கிடைக்கவில்லை எனத் தெரிவிக்கப்பட்டுள்ளது. மாணவி தனது கைபேசியில் நண்பர் ஒருவருடன் அடிக்கடி வாக்குவாதத்தில் ஈடுபட்டதாக அறைத் தோழி கூறியதாகத் தகவல் வெளியாகியுள்ளது. இருப்பினும், இந்தத் தகவலுக்கும் மரணத்துக்கும் தொடர்பு இருப்பது உறுதிப்படுத்தப்படவில்லை. மாணவியின் மரணத்துக்கான காரணம் குறித்து போலீசார் தொடர்ந்து விசாரித்து வருகின்றனர்.