6 மாதத்தில் 702 பேரைக் கொன்ற மியான்மர் ராணுவம் - ஐநா அதிர்ச்சி அறிக்கை!

மியான்மரில் கடந்த ஆறு மாத தேர்தல் காலத்தில் மட்டும் அந்நாட்டு ராணுவம் 702 அப்பாவிப் பொதுமக்களைக் கொடூரமான முறையில் கொன்றுள்ளதாக ஐக்கிய நாடுகள் சபையின் மனித உரிமைகள் அலுவலகம் வெளியிட்டுள்ள புதிய அறிக்கை உலக நாடுகளை அதிர்ச்சியில் ஆழ்த்தியுள்ளது. இந்தக் கொடூர மரணங்களுக்கு மியான்மர் ராணுவமே முழுப் பொறுப்பு என்று ஐநா திட்டவட்டமாகக் குற்றம் சாட்டியுள்ளது.

கடந்த ஆண்டு ஆகஸ்ட் மாதம் மியான்மர் ராணுவம் நாட்டில் தேர்தல் நடத்தப்படும் என அறிவித்தது முதல், இந்த ஆண்டு ஜனவரி இறுதி வரை நடந்த வாக்குப்பதிவு காலம் வரையிலான 6 மாத காலத்தை அடிப்படையாகக் கொண்டு இந்த அறிக்கை தயாரிக்கப்பட்டுள்ளது. நம்பகமான ஆதாரங்கள் மூலம் சரிபார்க்கப்பட்ட தரவுகளின்படி, இந்த 6 மாதங்களில் குறைந்தது 702 அப்பாவிப் பொதுமக்கள் கொல்லப்பட்டுள்ளனர். இதில் பலியானவர்களில் 224 பேர் பெண்களும், 153 பேர் குழந்தைகளும் ஆவர். அதாவது, பலியானவர்களில் பாதிக்கும் மேற்பட்டோர் பெண்களும் குழந்தைகளும் என்பது இந்தத் தாக்குதலின் கொடூர முகத்தை வெளிச்சம் போட்டுக் காட்டுகிறது.

மியான்மரில் பொதுமக்கள் சந்தித்து வரும் இந்தத் துயரத்திற்கும் அழிவிற்கும் ராணுவம் நடத்திய கொடூரமான வான்வழித் தாக்குதல்களே  மிக முக்கியக் காரணமாகும். ராணுவத்தின் ஜெட் போர் விமானங்கள், டிரோன்கள், பாராமோட்டார்கள் மற்றும் கைரோகாப்டர்கள் மூலம் நடத்தப்பட்ட வான்வழித் தாக்குதல்களில் மட்டுமே 505 பொதுமக்கள் பரிதாபமாக உயிரிழந்துள்ளனர். இது ஒட்டுமொத்த மரணங்களில் 57 விழுக்காடாகும்.

குறிப்பாகத் தேர்தல் அறிவிப்பு வெளியான ஆகஸ்ட் - செப்டம்பர் மாதங்களிலும், அதன் பின்னர் டிசம்பர் மாதத்திலும் ராணுவம் தனது வான்வழித் தாக்குதல்களை உச்சகட்டமாகத் தீவிரப்படுத்தியதால் இந்த மரணங்கள் நிகழ்ந்துள்ளன. ஜெனீவாவில் இது குறித்துப் பேசிய ஐநா மனித உரிமைகள் அலுவலகத்தின் செய்தித் தொடர்பாளர் ரவினா ஷாம்தசானி, "இந்த 702 பொதுமக்களின் மரணங்களுக்கும் மியான்மர் ராணுவமே முழுமையான பொறுப்பாகும்" என்று உறுதியாகத் தெரிவித்துள்ளார்.

மேலும், மியான்மர் ராணுவக் கட்டுப்பாட்டுத் தேர்தல் காலத்திற்கு முன்பாகவே அங்கு மனித உரிமை மீறல்களும், பொதுமக்களுக்கு எதிரான வன்முறைகளும் திட்டமிட்டு அரங்கேற்றப்பட்டதாக ஐநா குற்றஞ்சாட்டியுள்ளது.

இதன் காரணமாக, மியான்மர் விவகாரத்தைச் சர்வதேசக் குற்றவியல் நீதிமன்றத்திற்கு கொண்டு செல்ல வேண்டும் என்றும், மியான்மர் ராணுவத்திற்குச் சர்வதேச நாடுகள் ஆயுதங்கள், உதிரிபாகங்கள் மற்றும் ஜெட் எரிபொருட்களை வழங்குவதை உடனடியாக நிறுத்த வேண்டும் என்றும் ஐநா மனித உரிமைகள் அமைப்பு உலக நாடுகளுக்குக் கடுமையான கோரிக்கை விடுத்துள்ளது.