நீட் மறுதேர்வு வினாத்தாள் விநியோகம்... களமிறங்கும் இந்திய விமானப்படை பாதுகாப்பு அமைச்சகம்!

நாடு முழுவதும் மருத்துவப் படிப்புகளுக்கான நீட் மறுதேர்வு நடத்துவதற்கான ஏற்பாடுகள் தீவிரமாக நடைபெற்று வருகின்றன. இந்தத் தேர்வை எவ்வித குளறுபடிகளும் இன்றி பாதுகாப்பாக நடத்தி முடிக்கப் பல்வேறு புதிய வழிமுறைகள் பின்பற்றப்பட உள்ளன. இதன் ஒரு பகுதியாக நீட் தேர்வு வினாத்தாள்களைப் பாதுகாப்பாகக் கொண்டு செல்லும் பணியில் இந்திய விமானப்படை ஈடுபடவுள்ளதாகப் பாதுகாப்பு அமைச்சக அதிகாரிகள் அதிகாரப்பூர்வமாகத் தெரிவித்துள்ளனர்.

நாடு முழுவதும் தேர்வு நடைபெறவிருக்கும் முக்கிய 18 இடங்களுக்கு இந்த வினாத்தாள் தொகுப்புகளைக் கொண்டு செல்லும் பணி மிகக் குறுகிய காலத்தில் பாதுகாப்புடன் நடத்தப்பட உள்ளது. இதற்காக  விமானப்படைக்குச் சொந்தமான சிறப்பு விமானங்கள் மற்றும் ஹெலிகாப்டர்கள் பயன்படுத்தப்பட இருப்பதாகத் தெரிகிறது. நீட் மறுதேர்விற்கான முழுமையான தளவாட மற்றும் போக்குவரத்து உதவிகளை விமானப்படை வழங்கும் என்று அதிகாரிகள் தரப்பில் கூறப்பட்டுள்ளது.

மத்திய அரசின் இந்த புதிய பாதுகாப்பு நடவடிக்கை காரணமாக வினாத்தாள் கசிவு போன்ற முறைகேடுகள் முழுமையாகத் தவிர்க்கப்படும் என்று நம்பப்படுகிறது. வினாத்தாள்கள் அனைத்தும் விமானப்படையின் நேரடி கண்காணிப்பில் அந்தந்த தேர்வு மையங்களின் முக்கியப் பகுதிகளுக்குக் கொண்டு சேர்க்கப்படும். பாதுகாப்பு அமைச்சகத்தின் இந்த துரித முடிவானது தேர்வு எழுதும் மாணவ, மாணவிகள் மற்றும் அவர்களது பெற்றோர்கள் மத்தியில் பெரும் வரவேற்பைப் பெற்றுள்ளது.