விமானப்படை சிறப்பு விமானம் மூலம் வந்திறங்கிய நீட் மறுதேர்வு வினாத்தாள்கள்!
வினாத்தாள் கசிவை முழுமையாகத் தடுக்கும் நோக்கில், வருகிற ஜூன் 21 அன்று நாடு முழுவதும் நடைபெறவுள்ள நீட் மறுதேர்வுக்கான வினாத்தாள்களை விமானப்படை ஹெலிகாப்டர்கள் மற்றும் விமானங்கள் மூலம் கொண்டு செல்ல மத்திய பாதுகாப்புத் துறை தற்பொழுது சிறப்பு அனுமதி அளித்துள்ளது. அதன்படி மதுரையில் ஜூன் 21 நீட் மறுதேர்வுக்கான வினாத்தாள்கள் அனைத்தும் தற்பொழுது பலத்த பாதுகாப்புடன் கொண்டு வரப்பட்டு முறைப்படி ஒப்படைக்கப்பட்டுள்ளன.
இந்த அத்தியாவசிய வினாத்தாள்கள் அனைத்தும் இந்திய விமானப்படைக்குச் சொந்தமான பிரத்யேக சிறப்பு விமானம் மூலமாக மதுரை விமான நிலையத்திற்கு நேற்று மதியம் மிக ரகசியமாகக் கொண்டு வரப்பட்டன. அங்கு ஏற்கனவே தயார் நிலையில் இருந்த துப்பாக்கி ஏந்திய மத்திய தொழில் பாதுகாப்புப் படை வீரர்கள் மற்றும் காவல்துறையினர் அந்தப் பெட்டிகளைப் பொறுப்பேற்றுக்கொண்டனர்.
இதனைத் தொடர்ந்து மதுரையில் இருந்து சுற்றுவட்டாரத்தில் உள்ள ஆறு மாவட்டங்களுக்கு இந்தியத் தபால்துறைக்குச் சொந்தமான சிறப்பு வாகனங்கள் மூலமாக இந்த வினாத்தாள்கள் அனைத்தும் அடுக்கடுக்கான பாதுகாப்புடன் அனுப்பி வைக்கப்பட்டன. எவ்வித முறைகேடுகளும் இன்றித் தேர்வை நடத்தவே இந்த அசுர பாதுகாப்பு ஏற்பாடுகள் செய்யப்பட்டுள்ளதாகத் தேர்வுத் துறை அதிகாரிகள் தரப்பில் தெரிவிக்கப்பட்டுள்ளது.