திருவண்ணாமலை மகாதீபத் திருவிழாவில் புதிய வரலாறு.. முதன்முறையாக 3,000 பக்தர்களுக்கு இலவச தரிசன அனுமதிச் சீட்டு!

 
திருவண்ணாமலை கார்த்திகை தீபத் திருவிழா தீபம்

திருவண்ணாமலை அருள்மிகு அருணாச்சலேஸ்வரர் திருக்கோயிலில் நடைபெறவுள்ள திருக்கார்த்திகை தீபத் திருவிழாவை முன்னிட்டு, கோயில் வரலாற்றில் முதன்முறையாக 3,000 பக்தர்களுக்கு இணைய வழியில் முற்றிலும் கட்டணமில்லா தரிசன அனுமதிச் சீட்டுகள் (Free Online Darshan Pass) வழங்கப்பட்டுள்ளதாக இந்து சமய அறநிலையத்துறை அமைச்சர் சீ. ரமேஷ் தெரிவித்துள்ளார். கடந்த ஆண்டுகளில் பரணி தீபம் மற்றும் மகா தீப தரிசனத்திற்குக் கட்டண நுழைவுச் சீட்டு முறை நடைமுறையில் இருந்த நிலையில், இந்த ஆண்டு அனைத்துத் தரப்பு பக்தர்களும் பயன்பெறும் வகையில் கட்டண முறை ரத்து செய்யப்பட்டு இந்தப் புதிய முன்னெடுப்பு செயல்படுத்தப்பட்டுள்ளது.

நவம்பர் 24-ஆம் தேதி நடைபெறவுள்ள திருக்கார்த்திகை தீபத் திருவிழாவன்று, திருவண்ணாமலை மாவட்டத்தைச் சேர்ந்த உள்ளூர் பொதுமக்களுக்கும் சுவாமி தரிசனம் செய்ய உரிய வாய்ப்பளிக்கும் வகையில் 1,500 அனுமதிச் சீட்டுகள் உள்ளூர் மக்களுக்கும், மீதமுள்ள 1,500 அனுமதிச் சீட்டுகள் பிற மாவட்டங்களைச் சேர்ந்த பக்தர்களுக்கும் சமமாக ஒதுக்கீடு செய்யப்பட்டுள்ளன.

திருவண்ணாமலை கார்த்திகை மகா தீபம்

இதில் நவம்பர் 24-ம் தேதி அதிகாலை நடைபெறும் பரணி தீப தரிசனத்திற்கு 1,000 இலவசச் சீட்டுகளும் (உள்ளூர் 500, வெளியூர் 500), மாலையில் நடைபெறும் மகா தீப தரிசனத்திற்கு 2,000 இலவசச் சீட்டுகளும் (உள்ளூர் 1,000, வெளியூர் 1,000) வழங்கப்பட்டுள்ளன. கடந்த காலங்களில் இவற்றிற்கு முறையே ரூ.500 மற்றும் ரூ.600 கட்டணமாக வசூலிக்கப்பட்டு வந்தது குறிப்பிடத்தக்கது.

கோயிலின் அதிகாரப்பூர்வ இணையதளம் வாயிலாக ஆதார் எண்ணைப் பயன்படுத்தி விண்ணப்பித்த பக்தர்களிலிருந்து, கணினி மூலம் தானியங்கி குலுக்கல் முறையில் மிகுந்த வெளிப்படைத்தன்மையுடன் பயனாளிகள் தேர்வு செய்யப்பட்டுள்ளனர்.

தேர்வு செய்யப்பட்ட பக்தர்களின் பதிவு செய்யப்பட்ட செல்போன் எண்களுக்குக் குறுஞ்செய்தி வாயிலாக மின்னணு அனுமதிச் சீட்டுக்கான இணைப்பு அனுப்பி வைக்கப்பட்டுள்ளது. பக்தர்கள் அதனைப் பதிவிறக்கம் செய்து, நவம்பர் 24-ஆம் தேதி தங்களது அசல் ஆதார் அடையாள அட்டையுடன் கோயில் நுழைவுவாயிலில் காண்பித்து ஸ்கேன் செய்த பிறகு தரிசனத்திற்கு அனுமதிக்கப்படுவார்கள்.

தீபம்

மகா தீபத் திருவிழாவைக் காண தமிழகம் மற்றும் வெளிமாநிலங்களிலிருந்து சுமார் 40 லட்சத்திற்கும் மேற்பட்ட பக்தர்கள் வருகை தருவார்கள் என எதிர்பார்க்கப்படுகிறது. இதனையொட்டி, கடந்த நவம்பர் 18-ஆம் தேதி திருவண்ணாமலை மாவட்ட ஆட்சியர் மற்றும் அனைத்துத் துறை அலுவலர்களுடன் அமைச்சர் சீ. ரமேஷ் விரிவான ஆய்வுக் கூட்டத்தை நடத்தினார்.

பக்தர்களின் பாதுகாப்பு, சிறப்புப் போக்குவரத்து வசதிகள், வாகன நிறுத்துமிடங்கள், அன்னதான ஒழுங்குமுறைகள், குடிநீர், கழிப்பறைகள், தூய்மை மற்றும் மருத்துவ வசதிகளைத் தடையின்றி வழங்கவும், கிரிவலப் பாதையில் பக்தர்கள் சிரமமின்றி வலம் வருவதை உறுதி செய்யவும் அனைத்துத் துறைகளும் ஒருங்கிணைந்து செயல்பட அமைச்சர் அறிவுறுத்தியுள்ளார்.மேட்டூர் அணை நீர்வரத்து மற்றும் தீபத்தூண் விவகாரங்களுக்கு இடையே, திருவண்ணாமலை தீபத் திருவிழாவிற்குச் செய்யப்பட்டுள்ள இந்தக் கட்டணமில்லா தரிசன ஏற்பாடு பக்தர்களிடையே மிகுந்த வரவேற்பைப் பெற்றுள்ளது.