“இரவில் அதிக சத்தத்துடன் கேளிக்கை கூடாது” - உயர்நீதிமன்றம் தடை!

திண்டுக்கல் மாவட்டம், கொடைக்கானல் மன்னவநல்லூர் வனப்பகுதியை ஒட்டியுள்ள தனியார் விடுதிகளில் இரவு நேரங்களில் அதிக சத்தத்துடன் இசை மற்றும் நடன நிகழ்ச்சிகளை நடத்தச் சென்னை உயர் நீதிமன்ற மதுரை அமர்வு அதிரடியாக இடைக்காலத் தடை விதித்துள்ளது.

சுற்றுலாப் பயணிகளின் கேளிக்கை என்ற பெயரில் வனப்பகுதியின் இயற்கைச் சூழலும், வனவிலங்குகளின் அமைதியும் பாதிக்கப்படுவதைத் தடுக்கும் நோக்கில் நீதிமன்றம் இந்த முக்கிய உத்தரவைப் பிறப்பித்துள்ளது.

மன்னவநல்லூர் மற்றும் அதன் சுற்றுவட்டார வனப்பகுதிகளில் செயல்படும் தனியார் தங்கும் விடுதிகள் விதிகளுக்குப் புறம்பாகச் செயல்படுவதாகத் தொடரப்பட்ட வழக்கை விசாரித்த நீதிபதிகள் அமர்வு, பின்வரும் கடுமையான கட்டுப்பாடுகளை விதித்துள்ளது:

இரவு நேரங்களில் காதுகளைப் பிளக்கும் அளவிலான அதிக சத்தத்துடன் கூடிய கேளிக்கை இசை நிகழ்ச்சிகள், டிஜே பார்ட்டிகள் மற்றும் நடன நிகழ்ச்சிகளை நடத்த முற்றிலும் தடை விதிக்கப்படுகிறது. வனப்பகுதிக்கு அருகே இரவு நேரங்களில் 'கேம்ப் ஃபையர்' எனப்படும் தீ மூட்டித் தங்குவதற்கும், இரவு நேரங்களில் தேவையற்ற வாகனப் போக்குவரத்தை மேற்கொள்வதற்கும் கட்டுப்பாடுகள் விதிக்கப்பட்டுள்ளன.

சுற்றுலாத் தலங்களின் வணிகப் பெருக்கத்திற்காக வனவிலங்குகளின் வாழ்விடங்களை அச்சுறுத்தக் கூடாது எனச் சுட்டிக்காட்டியுள்ள நீதிபதிகள், நீதிமன்றத்தின் இந்த இடைக்கால உத்தரவை மீறிச் செயல்படும் தனியார் விடுதிகள் மற்றும் நபர்கள் மீது மாவட்ட நிர்வாகமும், வனத்துறையும் கடுமையான சட்டப்பூர்வ நடவடிக்கைகளை எடுக்க வேண்டும் என எச்சரித்துள்ளனர்.

கொடைக்கானலில் சுற்றுச்சூழல் பாதுகாப்பு மற்றும் வனவிலங்கு நடமாட்டத்தைக் கருத்தில் கொண்டு நீதிமன்றம் பிறப்பித்துள்ள இந்த அதிரடி உத்தரவு, சுற்றுச்சூழல் ஆர்வலர்களிடையே வரவேற்பைப் பெற்றுள்ளது.