புழல் சிறையில் 4000 கைதிகளில் ஒருவருக்கு மட்டும் தபால் ஓட்டு!

சென்னையை அடுத்த புழல் மத்திய சிறையில் சுமார் 4,000-க்கும் மேற்பட்ட தண்டனை மற்றும் விசாரணை கைதிகள் அடைக்கப்பட்டுள்ள நிலையில், அங்குள்ள ஒரே ஒரு விசாரணை கைதி மட்டும் தனது ஜனநாயகக் கடமையை ஆற்றியுள்ளது அனைவரது கவனத்தையும் ஈர்த்துள்ளது.

வழிப்பறி வழக்கில் கைது செய்யப்பட்டு விசாரணை கைதியாக சிறையில் உள்ள சரண் (23) என்ற இளைஞர், தமிழக சட்டமன்றத் தேர்தலை முன்னிட்டு நேற்று தனது தபால் வாக்கினைப் பதிவு செய்தார். சிறைத்துறை அதிகாரிகள் இதற்கான சிறப்பு ஏற்பாடுகளைச் செய்திருந்தனர். பல ஆயிரம் கைதிகள் இருந்தும் சரண் ஒருவருக்கு மட்டும் வாக்குரிமை கிடைத்தது எப்படி என்ற கேள்வி எழுந்துள்ளது.

இந்தியத் தேர்தல் விதிமுறைகளின்படி, சிறையில் அடைக்கப்பட்டுள்ள தண்டனை பெற்ற கைதிகளுக்கும், சாதாரண வழக்குகளில் சிறையில் இருக்கும் விசாரணை கைதிகளுக்கும் வாக்களிக்க உரிமை கிடையாது. ஆனால், தடுப்புக் காவல் சட்டத்தின் கீழ் கைது செய்யப்பட்டவர்களுக்கு மட்டும் தபால் மூலம் வாக்களிக்க விதிவிலக்கு அளிக்கப்பட்டுள்ளது.

அந்த வகையில், சரண் தடுப்புக் காவல் சட்டத்தின் கீழ் வைக்கப்பட்டிருந்ததால், அவர் மட்டுமே வாக்களிக்கத் தகுதியானவராக இருந்துள்ளார். இதற்காகத் தேர்தல் ஆணையத்திடம் முன்கூட்டியே அனுமதி பெறப்பட்டு, சிறை வளாகத்திலேயே அவர் தனது வாக்கைப் பதிவு செய்தார். 4000 பேர் மத்தியில் ஒரே ஒரு கைதி மட்டும் வாக்களித்த இந்தச் சம்பவம் சிறை வளாகத்தில் பெரும் ஆச்சரியத்தை ஏற்படுத்தியது.