செயற்கை நுண்ணறிவு (ஏ.ஐ.) தொழில்நுட்பத்தின் வளர்ச்சி எதிர்காலத்தில் மனிதர்களுக்கே ஆபத்தாக மாறக்கூடும் என ஓபன்ஏஐ அறக்கட்டளை நிர்வாகக் குழு உறுப்பினர் பால் கிறிஸ்டியானோ எச்சரிக்கை விடுத்துள்ளார்.

கனடாவின் டொராண்டோ நகரில் நடைபெற்ற ‘ஹிண்டன் லெக்சர்ஸ் 2026’ நிகழ்ச்சியில் பேசிய அவர், அடுத்த 3 ஆண்டுகளுக்குள் ஏ.ஐ. மனிதர்களின் கட்டுப்பாட்டை மீறிச் செயல்படும் அபாயம் அதிகமாக இருப்பதாகக் குறிப்பிட்டார்.

ஏ.ஐ. தொழில்நுட்பத்தின் தற்போதைய வளர்ச்சிப் போக்கு கவலை அளிப்பதாகத் தெரிவித்த அவர், அடுத்த 6 முதல் 12 மாதங்களுக்குள்ளேயே குறிப்பிடத்தக்க ஆபத்து ஏற்பட வாய்ப்புள்ளதாகக் கூறினார். ஏ.ஐ. அமைப்புகள் மனிதர்களின் நோக்கங்களுக்கு மாறாகத் தாங்களாகவே முடிவுகளை எடுக்கத் தொடங்கினால், அவற்றைக் கட்டுப்படுத்துவது கடினமாகலாம் என்றும் விளக்கினார்.

மேலும், ஏ.ஐ. தொடர்பான தவறுகள் மனித உயிரிழப்புகளுக்குக் காரணமாகலாம் என்றும் எச்சரித்தார். தொழில்நுட்ப வளர்ச்சியுடன் பாதுகாப்பு நடவடிக்கைகளும் வேகமாக மேம்படுத்தப்பட வேண்டும் என்றும், தேவையான சூழலில் ஏ.ஐ. வளர்ச்சியைத் தற்காலிகமாகக் கட்டுப்படுத்தும் வழிமுறைகள் இருக்க வேண்டும் என்றும் வலியுறுத்தினார்.பால் கிறிஸ்டியானோ தெரிவித்திருப்பவை அவரது ஆபத்து மதிப்பீடுகளே தவிர, ஏ.ஐ. குறிப்பிட்ட காலத்திற்குள் மனிதர்களின் கட்டுப்பாட்டை இழக்கும் என்பது உறுதிப்படுத்தப்பட்ட கணிப்பு அல்ல.