பஹல்காம் தாக்குதல்.. வாட்ஸ்அப் மூலம் இயக்கம்" – NIA குற்றப்பத்திரிகையில் வெளியான தகவல்

கடந்த 2025 ஆம் ஆண்டு ஜம்மு காஷ்மீரின் புகழ்பெற்ற சுற்றுலாத் தலமான பஹல்காமில், அப்பாவிச் சுற்றுலாப் பயணிகள் உட்பட 26 பேர் கொடூரமாகக் கொல்லப்பட்ட பயங்கரவாதத் தாக்குதல் வழக்கில், தேசிய புலனாய்வு முகமை  நீதிமன்றத்தில் அதிரடியாகக் குற்றப்பத்திரிகையைத் தாக்கல் செய்துள்ளது.

இந்த வழக்கில் 1,113 சாட்சிகளிடம் நடத்தப்பட்ட விரிவான விசாரணையின் அடிப்படையில் தயாரிக்கப்பட்டுள்ள இந்தக் குற்றப்பத்திரிகையில், எல்லைக்கு அப்பால் இருந்து பயங்கரவாதிகள் இந்தச் சதியை எவ்வாறு அரங்கேற்றினார்கள் என்பது குறித்த அதிர்ச்சியூட்டும் தகவல்கள் வெளியாகியுள்ளன.

என்.ஐ.ஏ தாக்கல் செய்துள்ள அதிகாரப்பூர்வ குற்றப்பத்திரிகையின்படி, பஹல்காம் தாக்குதலுக்கான முழு வரைபடமும் இந்தியாவின் எல்லையைத் தாண்டி பாகிஸ்தானில் இருந்தே திட்டமிடப்பட்டுள்ளது உறுதி செய்யப்பட்டுள்ளது.

பாகிஸ்தானின் லாகூர் நகரில் பாதுகாப்பாகப் பதுங்கியிருந்துகொண்டு, நவீனத் தொழில்நுட்பமான 'வாட்ஸ்அப்' செயலியின் குரல்வழி மற்றும் குறுஞ்செய்திகள் மூலமாகவே இந்தியாவில் உள்ள பயங்கரவாதிகளைத் தலைவர்கள் வழிநடத்தியுள்ளனர்.

தாக்குதலுக்குப் பயன்படுத்தப்பட்ட எலக்ட்ரானிக் சாதனங்கள் மற்றும் இணையப் பயன்பாடுகளை ஆய்வு செய்ததில், இதற்கான கட்டளைகள் அனைத்தும் பாகிஸ்தான் மண்ணில் இருந்தே பிறப்பிக்கப்பட்டுள்ளது டிஜிட்டல் சான்றுகளுடன் நிரூபிக்கப்பட்டுள்ளது.

இந்தத் தாக்குதலைப் பின்னின்று இயக்கிய முதன்மைச் சூத்திரதாரியாக, தடைசெய்யப்பட்ட லஷ்கர்-இ-தொய்பா (LeT) பயங்கரவாத அமைப்பின் மூத்த கமாண்டரான சாஜித் ஜட் என்பவரை என்.ஐ.ஏ முதல் குற்றவாளியாகக்  குற்றப்பத்திரிகையில் சேர்த்துள்ளது.

இந்தியாவில் தொடர் நாசவேலைகளைச் செய்யத் திட்டமிட்டு, காஷ்மீர் இளைஞர்களை மூளைச்சலவை செய்து ஆயுதமேந்த வைத்ததில் இவருக்கு முக்கியப் பங்கு இருப்பதாகக் குறிப்பிடப்பட்டுள்ளது.

சுற்றுலாப் பயணிகளைக் குறிவைத்து நடத்தப்பட்ட இந்தத் தாக்குதல், காஷ்மீரின் பொருளாதாரத்தையும் அமைதியையும் குலைப்பதற்காகவே நடத்தப்பட்டது என்பதைச் சுட்டிக்காட்டியுள்ள என்.ஐ.ஏ, இந்தச் சதியில் தொடர்புடைய உள்ளூர் உதவியாளர்கள் மற்றும் எல்லை தாண்டிய பயங்கரவாதிகள் அனைவருக்கும் கடுமையான தண்டனையைப் பெற்றுத் தருவதற்கான அனைத்துச் சாட்சியங்களையும் நீதிமன்றத்தில் சமர்ப்பித்துள்ளது.