செப்.22 முதல் பழனி முருகன் கோயில் ரோப்கார் சேவை மீண்டும் தொடக்கம்... !

திண்டுக்கல்: உலகப் புகழ்பெற்ற பழனி முருகன் கோயிலுக்கு செல்லும் பக்தர்களுக்கு முக்கிய அறிவிப்பு வெளியாகியுள்ளது. பராமரிப்புப் பணிகள் காரணமாக நிறுத்தப்பட்டிருந்த ரோப்கார் சேவை, பணிகள் நிறைவடைந்ததைத் தொடர்ந்து வரும் செப்டம்பர் 22-ம் தேதி முதல் மீண்டும் தொடங்கப்பட உள்ளது.அறுபடை வீடுகளில் ஒன்றான பழனி தண்டாயுதபாணி சுவாமி கோயிலுக்கு தமிழகம் மட்டுமின்றி நாட்டின் பல்வேறு பகுதிகளில் இருந்தும் ஏராளமான பக்தர்கள் வந்து செல்கின்றனர். மலைக்கோயிலுக்கு செல்ல படிப்பாதை, மின்இழுவை ரயில் மற்றும் ரோப்கார் உள்ளிட்ட வசதிகள் பக்தர்களுக்கு உள்ளன.

இதில் ரோப்கார் சேவை பக்தர்களின் விருப்பமான போக்குவரத்து வசதிகளில் ஒன்றாக உள்ளது. மலைப்பாதையில் நீண்ட நேரம் நடந்து செல்லாமல் குறுகிய நேரத்தில் கோயிலை சென்றடைய முடிவதுடன், பயணத்தின்போது பழனி மலை மற்றும் சுற்றுப்புற இயற்கைக் காட்சிகளையும் ரசிக்க முடியும்.ரோப்கார் சேவைக்கான பராமரிப்புப் பணிகள் சமீபத்தில் மேற்கொள்ளப்பட்டன. இதன் ஒரு பகுதியாக பழைய பெட்டிகளுக்கு பதிலாக புதிய பெட்டிகள் பொருத்துதல், தேவையான புனரமைப்புப் பணிகள் மற்றும் தொழில்நுட்ப சோதனைகள் மேற்கொள்ளப்பட்டதாக கோயில் நிர்வாகம் தெரிவித்துள்ளது.

பராமரிப்புப் பணிகள் முடிவடைந்ததைத் தொடர்ந்து ரோப்கார் இயக்கப்பட்டு சோதனை ஓட்டமும் மேற்கொள்ளப்பட்டது. பாதுகாப்பு தொடர்பான பணிகள் நிறைவடைந்த நிலையில், பக்தர்களின் பயன்பாட்டுக்காக சேவையை மீண்டும் தொடங்க கோயில் நிர்வாகம் முடிவு செய்துள்ளது.அதன்படி, வரும் செப்டம்பர் 22-ம் தேதி முதல் பழனி முருகன் கோயில் ரோப்கார் சேவை மீண்டும் செயல்பட உள்ளது. இதனால் பழனி கோயிலுக்கு வருகை தரும் பக்தர்கள் மகிழ்ச்சி அடைந்துள்ளனர்.பராமரிப்புப் பணிகளுக்குப் பிறகு புதிய பெட்டிகளுடன் ரோப்கார் சேவை மீண்டும் தொடங்கப்படுவதால், பக்தர்களுக்கு பாதுகாப்பான மற்றும் விரைவான மலைப்பயண வசதி கிடைக்கும் என எதிர்பார்க்கப்படுகிறது.