எதிர்க்கட்சிகளின் கடும் எதிர்ப்பை மீறி பொதுத்தேர்வு முறைகேடு தடுப்பு மசோதா நிறைவேற்றம்!

மக்களவையில் எதிர்க்கட்சி உறுப்பினர்களின் கடுமையான கூச்சல் குழப்பங்கள் மற்றும் எதிர்ப்புகளுக்கு மத்தியில் முக்கிய மசோதா ஒன்று நிறைவேற்றப்பட்டது. பொதுத் தேர்வு (முறையற்ற வழிமுறைகளைத் தடுத்தல்) திருத்த மசோதா, 2026 குரல் வாக்கெடுப்பு மூலம் மக்களவையில் வெற்றிகரமாக நிறைவேறியுள்ளது. டெல்லி ஜந்தர்மந்தர் பகுதியில் மாணவர்கள் மீது நடத்தப்பட்ட துப்பாக்கிச் சூடு சம்பவத்திற்கு ஒன்றிய உள்துறை அமைச்சர் அமித் ஷா தான் காரணம் என காங்கிரஸ் தலைவர் ராகுல் காந்தி பரபரப்புக் குற்றச்சாட்டை முன்வைத்தார். இதனால் அவையில் அனல் பறக்கும் விவாதங்களும்   குழப்பங்களும் நிலவிய சூழலிலேயே இந்த மசோதா நிறைவேற்றப்பட்டது.

ஒன்றிய அமைச்சர் ஜிதேந்திர சிங் இந்த வரலாற்றுச் சிறப்புமிக்கச் சட்டத் திருத்த மசோதாவை அவையில் தாக்கல் செய்து பேசினார். போட்டித் தேர்வுகளில் நடைபெறும் வினாத்தாள் கசிவு மற்றும் முறைகேடுகளைத் தடுப்பதே இந்த மசோதாவின் முதன்மை நோக்கமாகும். தேர்வு நடைமுறைகளில் வெளிப்படைத்தன்மையைக் கொண்டு வரக் கடுமையான சிறைத்தண்டனைகள் மற்றும் அபராதங்களை இந்த மசோதா முன்மொழிகிறது.

மாணவர்களின் எதிர்காலத்தைப் பாதுகாக்கும் வகையில் சட்டக் கட்டமைப்பை மேலும் வலுப்படுத்த இந்த புதிய மசோதா கொண்டு வரப்பட்டுள்ளது.இந்த புதிய சட்டத்தின்படி பொதுத் தேர்வு முறைகேடுகளில் ஈடுபடும் தனிநபர்களுக்கு 10 ஆண்டுகள் வரை சிறைத்தண்டனை விதிக்கப்படும். அத்துடன் குற்றங்களில் ஈடுபடும் தனிநபர்களுக்கு ரூ.50 லட்சம் வரை அபராதம் விதிக்கவும் இந்த மசோதாவில் வழிவகை செய்யப்பட்டுள்ளது. மேலும் வினாத்தாள் கசிவு மற்றும் கூட்டுச் சதித் திட்டங்களில் ஈடுபடுவோருக்கு ரூ.10 கோடி வரை அபராதம் விதிக்கப்பட உள்ளது.