பட்டாசு ஆலை வெடிப்பில் பலி எண்ணிக்கை 25 ஆக உயர்வு!

விருதுநகர் அருகே உள்ள கட்டனார்பட்டியில் செயல்பட்டு வந்த தனியார் பட்டாசு ஆலையில் நேற்று ஏற்பட்ட பயங்கர வெடி விபத்தில், உயிரிழந்தவர்களின் எண்ணிக்கை இன்று 25 ஆக அதிகரித்துள்ளது. நேற்று பிற்பகல் 3.30 மணியளவில் தொழிலாளர்கள் சரவெடி தயாரிக்கும் பணியில் ஈடுபட்டிருந்தபோது, எதிர்பாராத விதமாக ஏற்பட்ட மருந்து உராய்வு காரணமாகத் தீப்பற்றி இந்த விபத்து நேரிட்டது. இதில் பட்டாசுகள் இருப்பு வைக்கப்பட்டிருந்த அடுத்தடுத்த 3 அறைகளும் இடிந்து தரைமட்டமான நிலையில், அந்தப் பகுதியே போர்க்களம் போலக் காட்சியளித்தது.

இந்தக் கொடூர விபத்தில் உயிரிழந்த 25 பேரில் 21 பேர் பெண்கள் மற்றும் 4 பேர் ஆண்கள் என்பது பெரும் சோகத்தை ஏற்படுத்தியுள்ளது. விபத்து நடந்த இடத்தில் மீட்புப் பணிகள் நடைபெற்றுக் கொண்டிருந்தபோது, அங்கு மீண்டும் ஒரு வெடி விபத்து ஏற்பட்டதில் உதவி தீயணைப்பு அலுவலர் மற்றும் பெண் காவலர்கள் உட்பட மேலும் 12 பேர் காயமடைந்தனர். காயமடைந்த அனைவரும் விருதுநகர் அரசு மருத்துவமனையில் அனுமதிக்கப்பட்டு தீவிர சிகிச்சை பெற்று வருகின்றனர். பலரது உடல்கள் அடையாளம் காண முடியாத அளவுக்குக் கருகியுள்ளதால் மரபணுச் சோதனை மூலம் அடையாளம் காணும் பணிகள் நடைபெற்று வருகின்றன.

விபத்து குறித்து மாவட்ட நிர்வாகம் நடத்திய முதற்கட்ட விசாரணையில், பட்டாசு ஆலையில் பல்வேறு பாதுகாப்பு விதிமுறைகள் மீறப்பட்டதே இந்த உயிர் இழப்புகளுக்கு முக்கியக் காரணம் எனத் தெரியவந்துள்ளது. குறிப்பாக, அனுமதிக்கப்பட்ட எண்ணிக்கையை விடக் கூடுதல் தொழிலாளர்கள் பணியில் அமர்த்தப்பட்டதும் விபத்தின் வீரியத்தை அதிகரித்துள்ளது. இதற்கிடையே, கடந்த 13-ம் தேதி சாத்தூர் அருகே நடந்த மற்றொரு வெடி விபத்தில் காயமடைந்த ரமேஷ் என்பவரும் இன்று சிகிச்சை பலனின்றி உயிரிழந்ததால், விருதுநகர் மாவட்டம் முழுவதும் பெரும் சோகத்தில் ஆழ்ந்துள்ளது.