தொகுதி ரவுண்ட்-அப்: திமுக கோட்டையை தகர்க்குமா அதிமுக - பழனி தொகுதி முழுமையான அலசல்!

பழனி சட்டமன்றத் தொகுதியில் 1951 முதல் 2021 வரை மொத்தம் 16 முறை தேர்தல் நடைபெற்றுள்ளது. இந்தத் தொகுதியின் தேர்தல் வரலாற்றைத் திரும்பிப் பார்த்தால், அதிகபட்சமாக திமுக 6 முறை வெற்றி பெற்றுத் தனது ஆதிக்கத்தைச் செலுத்தியுள்ளது. அதிமுக மற்றும் மார்க்சிஸ்ட் கம்யூனிஸ்ட் கட்சிகள் தலா 3 முறையும், காங்கிரஸ் மற்றும் சுயேச்சை வேட்பாளர்கள் தலா 2 முறையும் இங்கு வெற்றி பெற்றுள்ளனர். ஆன்மீகப் பூமியான பழனியில் அரசியல் ரீதியாகவும் எப்போதும் ஒரு பலப்பரீட்சை நிலவி வருவது குறிப்பிடத்தக்கது.

கடந்த இரண்டு தேர்தல்களிலும் திமுக சார்பில் போட்டியிட்டு வெற்றி பெற்ற ஐ.பி. செந்தில்குமார், தற்போது பழனி தொகுதியின் சட்டமன்ற உறுப்பினராகப் பதவி வகித்து வருகிறார். இருப்பினும், வரும் 2026 சட்டமன்றத் தேர்தலில் அவர் திண்டுக்கல் தொகுதியில் களம் இறங்க உள்ளதால், பழனி தொகுதியில் ஒரு வெற்றிடம் ஏற்பட்டுள்ளது. தொடர்ந்து இரண்டு முறை தொகுதியைத் தன்வசம் வைத்திருந்த சிட்டிங் எம்எல்ஏ தொகுதி மாறுவது, உள்ளூர் அரசியல் வட்டாரத்தில் பெரும் விவாதத்தை ஏற்படுத்தியுள்ளது.

திமுகவின் கோட்டையாகக் கருதப்படும் பழனியை மீண்டும் கைப்பற்ற அக்கட்சி புதிய வியூகங்களை வகுத்து வருகிறது. அதே சமயம், இழந்த செல்வாக்கை மீட்டெடுக்க அதிமுகவும் தீவிரமாகப் பணியாற்றி வருவதால், வரும் தேர்தலில் அங்கு பலமுனைப் போட்டி நிலவ வாய்ப்புள்ளது. செல்வாக்கு மிக்க வேட்பாளர் களம் மாறுவதால், பழனி தொகுதியின் புதிய முகமாக யார் வருவார், மக்கள் யாருக்கு வாக்களிப்பார்கள் என்ற ஆர்வம் தொகுதி மக்களிடையே இப்போதே மேலோங்கியுள்ளது.