செங்கல்பட்டு பைபாஸ் சாலையில் உள்ள பெட்ரோல் பங்க்கில் எரிபொருள் நிரப்ப வந்த வாலிபர், மர்ம கும்பலால் சரமாரியாக வெட்டிக் கொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.

பெட்ரோல் பங்க்கில் என்ன நடந்தது?

செங்கல்பட்டு பைபாஸ் சாலையில் உள்ள பெட்ரோல் பங்க்கிற்கு வீரா என்ற முத்து கிருஷ்ணன் என்ற வாலிபர் இருசக்கர வாகனத்தில் எரிபொருள் நிரப்ப வந்ததாக கூறப்படுகிறது.அப்போது இருசக்கர வாகனங்களில் வந்த 6 பேர் கொண்ட கும்பல், அரிவாள் உள்ளிட்ட கூர்மையான ஆயுதங்களால் அவரை சரமாரியாக தாக்கியதாக கூறப்படுகிறது. படுகாயமடைந்த முத்து கிருஷ்ணன் சம்பவ இடத்திலேயே உயிரிழந்ததாக முதற்கட்ட தகவல்கள் தெரிவிக்கின்றன.

6 பேர் கொண்ட கும்பல் தப்பியோட்டம்

கொலை சம்பவத்தை தொடர்ந்து, அந்த கும்பல் அங்கிருந்து உடனடியாக தப்பிச் சென்றதாக கூறப்படுகிறது. இதனால் அப்பகுதியில் பரபரப்பு ஏற்பட்டது.சம்பவம் குறித்து தகவல் அறிந்த போலீசார் வழக்குப்பதிவு செய்து விசாரணையை தொடங்கியுள்ளனர். பெட்ரோல் பங்க்கில் பொருத்தப்பட்டுள்ள சிசிடிவி கேமரா காட்சிகளையும் ஆய்வு செய்து, தப்பியோடியவர்களை அடையாளம் காணும் பணியில் போலீசார் ஈடுபட்டுள்ளதாக கூறப்படுகிறது.

கொலைக்கான காரணம் என்ன?

முத்து கிருஷ்ணன் எதற்காக கொலை செய்யப்பட்டார் என்பது உடனடியாக தெரியவில்லை. முன்விரோதம் அல்லது வேறு ஏதேனும் காரணமா என்பது குறித்து போலீசார் விசாரணை நடத்தி வருகின்றனர்.தப்பியோடிய 6 பேரையும் பிடிக்க போலீசார் தீவிரமாக தேடி வருகின்றனர். விசாரணை முடிவில் கொலைக்கான காரணம் மற்றும் சம்பவத்தின் முழு பின்னணி தெரியவரும் என எதிர்பார்க்கப்படுகிறது.