PF வட்டிப்பணம் இம்மாதமே கணக்கில் வரவு - மத்திய அரசு ஒப்புதல்!

மத்திய அரசு ஊழியர்கள் மற்றும் தனியார் துறை ஊழியர்கள் உள்ளிட்ட தொழிலாளர் வருங்கால வைப்பு நிதி  சந்தாதாரர்களுக்கு ஒரு மகிழ்ச்சியான செய்தி வெளியாகியுள்ளது. நடப்பு 2025-26 நிதியாண்டிற்கான PF வைப்புத்தொகைக்கான 8.25% வட்டி விகிதத்திற்கு மத்திய நிதி அமைச்சகம் தற்போது தனது இறுதி ஒப்புதலை வழங்கியுள்ளது. இதன் மூலம், ஒட்டுமொத்தமாக நாடு முழுவதும் உள்ள 7 கோடிக்கும் அதிகமான PF சந்தாதாரர்களின் கணக்குகளில் இந்த வட்டிப் பணம் இம்மாத இறுதிக்குள் நேரடியாக வந்து சேரும் எனத் தெரியவந்துள்ளது.

கடந்த மார்ச் 2ஆம் தேதி நடைபெற்ற வருங்கால வைப்பு நிதி நிறுவனத்தின் மத்திய அறங்காவலர்கள் வாரிய கூட்டத்தில், இந்த ஆண்டுக்கான வட்டி விகிதம் 8.25% ஆக நிர்ணயிக்கப்பட்டுப் பரிந்துரைக்கப்பட்டது. இந்த நிலையில், மத்திய நிதி அமைச்சகம் இப்பரிந்துரைக்குத் தற்போது முறைப்படி ஒப்புதல் முத்திரையிட்டுள்ளது. இதன் மூலம், கடந்த மூன்று நிதி ஆண்டுகளாக (2023-24, 2024-25 மற்றும் தற்போது 2025-26) PF வட்டி விகிதம் எவ்வித மாற்றமும் இன்றி தொடர்ந்து 8.25% என்ற நிலையான அளவில் நீடிக்கிறது என்பது குறிப்பிடத்தக்கது.

முன்பெல்லாம் வட்டிப் பணம் கணக்கில் ஏறுவதற்குக் கூடுதல் காலதாமதம் ஏற்பட்டு வந்த நிலையில், தற்போது வருங்கால வைப்பு நிதி நிறுவனம் தனது டிஜிட்டல் உள்கட்டமைப்பை மேம்படுத்தியுள்ளது. புதிய டிஜிட்டல் தொழில்நுட்ப வசதிகள் மூலம், நிதி அமைச்சகத்தின் ஒப்புதல் கிடைத்தவுடனே சந்தாதாரர்களின் கணக்குகளில் வட்டித் தொகையை உடனடியாகச் சேர்க்கும் பணிகள் முடுக்கிவிடப்பட்டுள்ளன.

எனவே, இந்த ஜூன் மாத இறுதிக்குள்ளேயே சந்தாதாரர்களின் கணக்குகளில் வட்டிப் பணம் முழுமையாகப் பிரதிபலிக்கும் என அதிகாரிகள் வட்டாரங்கள் தெரிவிக்கின்றன. சந்தாதாரர்கள் தங்களது புதுப்பிக்கப்பட்ட கணக்கு விபரங்களை வழக்கம் போல உமாங் செயலி, EPFO அதிகாரப்பூர்வ இணையதளத்தின் இ-பாஸ்புக் வசதி அல்லது மிஸ்டு கால் மற்றும் எஸ்.எம்.எஸ் சேவைகள் மூலமாக மிக எளிதாகச் சரிபார்த்துக் கொள்ள முடியும்.