செஷல்ஸ் நாட்டில் உலகின் மிக வயதான ‘ஜோனதன்’ ஆமையுடன் பிரதமர் மோடி சந்திப்பு!

உலக அளவில் இந்தியா - செஷல்ஸ் நாடுகளுக்கு இடையேயான சர்வதேச உறவில் ஒரு வரலாற்றுச் சிறப்புமிக்க சுவாரஸ்ய நிகழ்வு அரங்கேறியுள்ளது. இந்தியா மற்றும் செஷல்ஸ் நாடுகளுக்கு இடையேயான 50-வது தூதரக ஆண்டு பொன்விழா மற்றும் அந்நாட்டின் தேசிய தினக் கொண்டாட்டங்களில் முதன்மை விருந்தினராகப் பங்கேற்கப் பிரதமர் நரேந்திர மோடி 3 நாள் அரசுமுறைப் பயணமாகச் செஷல்ஸ் சென்றுள்ளார்.

செஷல்ஸ் நாட்டிற்குச் சென்றடைந்த பிரதமர் மோடி, அங்குள்ள தேசிய தாவரவியல் பூங்காவிற்கு நேரில் சென்றார். அங்கு, கின்னஸ் உலக சாதனைப் புத்தகத்தால் "உலகின் மிக வயதான நிலவாழ் உயிரினம்" என்று அதிகாரப்பூர்வமாக அங்கீகரிக்கப்பட்ட 'ஜோனதன்' என்ற ராட்சத ஆமையை நேரில் சந்தித்து ஆச்சரியத்துடன் கண்டு மகிழ்ந்தார்.

இந்த அல்டாப்ரா வகை ராட்சத ஆமை கடந்த 1832-ஆம் ஆண்டு பிறந்ததாகக் கணக்கிடப்பட்டுள்ளது. தற்பொழுது இதற்கு 194 வயதாகும் நிலையிலும், செஷல்ஸ் நாட்டின் மிக முக்கிய அடையாளமாகப் பராமரிக்கப்பட்டு வருகிறது. னித வரலாற்றின் பல முக்கிய உலகப் போர்கள் மற்றும் திருப்புமுனைகளைக் கடந்து வாழ்ந்து வரும் இந்த அசாத்திய ஆமையுடனான சந்திப்பு, சுற்றுச்சூழல் மற்றும் இயற்கை வளப் பாதுகாப்பின் அவசியத்தை உணர்த்துவதாக அமைந்தது.

இந்தச் சந்திப்பைத் தொடர்ந்து, செஷல்ஸ் நாட்டின் அதிபர் டாக்டர் பேட்ரிக் ஹெர்மினியைப் பிரதமர் மோடி நேரில் சந்தித்துப் இருதரப்பு உறவுகள் குறித்து தீவிர ஆலோசனை நடத்தினார். இரு நாடுகளுக்கும் இடையே கடல்சார் பாதுகாப்பு விண்வெளித் துறை ஒத்துழைப்பு, காலநிலை மாற்றப் பின்னடைவு மற்றும் நீலப் பொருளாதாரம் ஆகிய முக்கியத் துறைகளில் கூட்டுறவை மேலும் வலுப்படுத்துவது குறித்து இரு தலைவர்களும் விவாதித்தனர்.

இந்த வரலாற்றுப் பயணத்தின் நினைவாகவும், இரு நாடுகளின் அசாத்திய நட்புறவைக் கொண்டாடும் விதமாகவும் பூங்கா வளாகத்தில் பிரதமர் மோடி மற்றும் அதிபர் பேட்ரிக் ஹெர்மினி ஆகியோர் இணைந்து ஒரு மரக்கன்றை நட்டு வைத்தனர்.

மாறிவரும் உலக அரசியல் சூழலில், இந்தியப் பெருங்கடல் பகுதியில் உள்ள மிக முக்கிய அண்டை நாடான செஷல்ஸ் நாட்டுடனான பிரதமர் மோடியின் இந்த அசாத்தியப் பயணம் மற்றும் 194 வயது ஆமையுடனான சந்திப்பு சர்வதேச அளவில் தற்பொழுது அனைவரின் கவனத்தையும் ஈர்த்துள்ளது.