தமிழகத்தில் எலுமிச்சை விலை கடும் உயர்வு.. சில்லறை விற்பனையில் ஒரு பழம் ரூ.20 வரை விற்பனை!

தமிழகத்தில் எலுமிச்சையின் விலை திடீரெனக் கடுமையாக உயர்ந்துள்ளதால் நுகர்வோர் பாதிக்கப்பட்டுள்ளனர். சில்லறை விற்பனை கடைகளில் ஒரு எலுமிச்சைப் பழம் ரூ.15 முதல் ரூ.20 வரை விற்பனை செய்யப்பட்டு வருகிறது.

தமிழகத்தில் கடந்த செப்டம்பர் மாதம் கிலோ ரூ.150 முதல் ரூ.160 வரை விற்பனையாகி வந்த எலுமிச்சை, தற்போது இரு மடங்காக உயர்ந்து கிலோ ரூ.300 வரை விற்கப்படுகிறது. தொடர் கடும் வெயில் மற்றும் நிலவும் வறட்சியான சூழல் காரணமாகப் பயிர்களில் விளைச்சல் பெருமளவில் குறைந்ததே இந்த விலை உயர்வுக்கு முக்கியக் காரணமாக வியாபாரிகள் தெரிவிக்கின்றனர்.

ஆயுத பூஜை மற்றும் விஜயதசமி உள்ளிட்ட பண்டிகைகள் நெருங்கி வருவதால், எலுமிச்சைக்குத் தேவையும் அதிகமாகியுள்ளது. இதன் காரணமாக இந்த வாரத்தில் விலை குறைய வாய்ப்பில்லை எனச் சந்தை வட்டாரங்கள் தெரிவிக்கின்றன.