நேபாளத்தின் இளம் பிரதமராக பாலேந்திர ஷா: பிரதமர் மோடி வாழ்த்து!

நேபாளத்தில் நிலவி வந்த அரசியல் கொந்தளிப்புகளுக்கு முற்றுப்புள்ளி வைக்கும் விதமாக, மக்கள் ஆதரவுடன் புதிய பிரதமராகப் பதவியேற்றுள்ள 35 வயதான பாலேந்திர ஷாவுக்கு இந்தியப் பிரதமர் நரேந்திர மோடி பாராட்டு தெரிவித்துள்ளார்.

நேபாள வரலாற்றிலேயே 35 வயதில் பிரதமராகும் மிக இளம் வயதுத் தலைவர் என்ற பெருமையை பாலேந்திர ஷா பெற்றுள்ளார்.

பிரதமர் மோடி தனது 'எக்ஸ்' தளத்தில் வெளியிட்டுள்ள வாழ்த்துச் செய்தியில், "நேபாளத்தின் பிரதமராகப் பதவியேற்றுள்ள பாலேந்திர ஷாவுக்கு எனது மனமார்ந்த வாழ்த்துகள். இந்த வெற்றி உங்கள் தலைமையின் மீது நேபாள மக்கள் வைத்துள்ள நம்பிக்கையைப் பிரதிபலிக்கிறது. இந்தியா - நேபாளம் இடையிலான ஆழமான நட்புறவை அடுத்த கட்டத்திற்கு எடுத்துச் செல்லவும், இரு நாட்டு மக்களின் நலனுக்காகவும் உங்களுடன் இணைந்து பணியாற்ற ஆவலோடு காத்திருக்கிறேன்."

முன்னாள் பிரதமர் கே.பி. சர்மா ஒலிக்கு எதிராக இளைஞர்கள் நடத்திய தன்னெழுச்சியான போராட்டத்தைத் தொடர்ந்து அவர் பதவியை ராஜினாமா செய்தார். மார்ச் 5-ஆம் தேதி நடைபெற்ற நாடாளுமன்றத் தேர்தலில், பாலேந்திர ஷாவின் ராஷ்டிரிய சுதந்திர கட்சி மிகப்பெரிய வெற்றியைப் பெற்றது.

காட்மாண்டு மாநகராட்சி மேயராக இருந்து இளைஞர்களின் நன்மதிப்பைப் பெற்ற பாலேந்திர ஷா, தற்போது நாட்டின் பிரதமராக உயர்ந்துள்ளார். இவர் ஒரு ராப் இசை கலைஞர் மற்றும் பொறியாளர் என்பதும் குறிப்பிடத்தக்கது.

இந்தியாவுடனான உறவு:

நேபாளத்தின் புதிய அரசு இந்தியாவுடன் மின்சாரம், எல்லைப் பாதுகாப்பு மற்றும் வர்த்தக ரீதியான புதிய ஒப்பந்தங்களை மேற்கொள்ள வாய்ப்புள்ளதாக அரசியல் ஆய்வாளர்கள் கருதுகின்றனர். குறிப்பாக, நேபாள இளைஞர்களின் வேலைவாய்ப்பு மற்றும் தொழில்நுட்ப மேம்பாட்டிற்கு இந்தியாவின் உதவி மிக அவசியமாகப் பார்க்கப்படுகிறது.