இன்று கர்நாடகா, தெலங்கானா மாநிலங்களுக்குச் செல்கிறார் பிரதமர் மோடி... ரூ.9,400 கோடி மதிப்பிலான திட்டங்களைத் தொடங்கி வைக்கிறார்!

பாரத பிரதமர் நரேந்திர மோடி இன்று கர்நாடகா மற்றும் தெலுங்கானா ஆகிய மாநிலங்களுக்கு அதிரடி பயணம் மேற்கொள்கிறார். பெங்களூருவில் நடைபெறும் ‘வாழும் கலை’ அமைப்பின் 45-வது ஆண்டு விழாவில் பங்கேற்கும் பிரதமர், அங்குப் புதிதாகக் கட்டப்பட்டுள்ள பிரம்மாண்ட தியான மண்டபத்தையும் திறந்து வைக்கிறார். ஆன்மிக நிகழ்ச்சியைத் தொடர்ந்து, அவர் உடனடியாக தெலுங்கானா மாநிலத்திற்குப் புறப்பட்டுச் சென்று அங்குள்ள பல்வேறு அரசுத் திட்டங்களில் பங்கேற்க உள்ளார்.

தெலுங்கானா தலைநகர் ஐதராபாத் செல்லும் பிரதமர் மோடி, அங்கு சுமார் ரூ.9,400 கோடி மதிப்பிலான மெகா வளர்ச்சித் திட்டங்களைத் தொடங்கி வைத்து நாட்டுக்கு அர்ப்பணிக்கிறார். இந்தத் திட்டங்கள் தெலுங்கானா மாநிலத்தின் உள்கட்டமைப்பு மற்றும் பொருளாதார வளர்ச்சியை அடுத்த கட்டத்திற்கு எடுத்துச் செல்லும் என எதிர்பார்க்கப்படுகிறது. அரசு நிகழ்ச்சிகளை முடித்துக் கொண்டு இன்று இரவே அவர் விமானம் மூலம் குஜராத் மாநிலத்திற்குப் புறப்பட்டுச் செல்கிறார்.

நாளை குஜராத்தில் உள்ள புகழ்மிக்க சோம்நாத் கோவிலில் நடைபெறும் ‘சோம்நாத் அம்ருத் மோட்சவ்’ விழாவில் பிரதமர் மோடி கலந்துகொள்கிறார். அந்நிய படையெடுப்புகளால் பாதிக்கப்பட்ட சோம்நாத் கோவில் புனரமைக்கப்பட்டதன் 75-வது ஆண்டு விழா தற்போது மிக விமரிசையாகக் கொண்டாடப்பட்டு வருகிறது. ஒரே நாளில் ஆன்மீகம், வளர்ச்சித் திட்டங்கள் எனப் பிரதமர் மோடி மேற்கொள்ளும் இந்த மின்னல் வேகப் பயணம் அரசியல் வட்டாரங்களில் பெரும் கவனத்தைப் பெற்றுள்ளது.