தனியார் பஸ்கள் நாளை ஓடாது! மினி பஸ்கள் வழக்கம்போல் இயங்கும்

தமிழகம் முழுவதும் தனியார் பேருந்துகள் செப்டம்பர் 30-ம் தேதி ஒருநாள் வேலைநிறுத்தத்தில் ஈடுபட உள்ள நிலையில், மினி பேருந்துகள் வழக்கம்போல் இயக்கப்படும் என தமிழ்நாடு மினி பேருந்து உரிமையாளர்கள் சம்மேளனம் தெரிவித்துள்ளதாக தகவல் வெளியாகியுள்ளது.தனியார் பேருந்துகளிலும் பெண்கள், திருநங்கைகள் மற்றும் மாற்றுத்திறனாளிகளுக்கு இலவசப் பயணத் திட்டத்தை விரிவுபடுத்தி, அதற்கான அரசு மானியத்தை வழங்க வேண்டும் என்பது உள்ளிட்ட கோரிக்கைகளை வலியுறுத்தி தனியார் பேருந்து உரிமையாளர்கள் சம்மேளனம் வேலைநிறுத்தத்தை அறிவித்துள்ளது. மேலும், பேருந்து கட்டணத்தை மாற்றியமைக்க வேண்டும் என்றும் கோரிக்கை விடுக்கப்பட்டுள்ளது.

இதன்படி, செப்டம்பர் 29-ம் தேதி நள்ளிரவு முதல் செப்டம்பர் 30-ம் தேதி நள்ளிரவு வரை 24 மணி நேரம் தனியார் பேருந்துகள் இயக்கப்படாது என அறிவிக்கப்பட்டுள்ளது. இதனால் தனியார் பேருந்துகளை நம்பி தினசரி பயணம் மேற்கொள்ளும் பொதுமக்களுக்கு போக்குவரத்து சிரமம் ஏற்படும் நிலை உருவாகியுள்ளது.

இந்த நிலையில், தமிழகம் முழுவதும் மினி பேருந்துகள் வழக்கம்போல் இயக்கப்படும் என தமிழ்நாடு மினி பேருந்து உரிமையாளர்கள் சம்மேளனத் தலைவர் கொடியரசன் தெரிவித்துள்ளார். இதனால் வேலைக்குச் செல்வோர், பள்ளி மற்றும் கல்லூரி மாணவர்கள் உள்ளிட்ட தினசரி பயணிகளுக்கு மாற்றுப் போக்குவரத்து வசதி கிடைக்கும் என எதிர்பார்க்கப்படுகிறது.எனினும், குறிப்பிட்ட வழித்தடங்களில் மினி பேருந்துகளின் எண்ணிக்கை மற்றும் சேவை நேரம் மாறுபடலாம் என்பதால் பயணிகள் தங்களது வழித்தடத்துக்கான பேருந்து சேவையை முன்கூட்டியே தெரிந்துகொண்டு பயணத்தை திட்டமிடுவது நல்லது.

தனியார் பேருந்து வேலைநிறுத்தம் ஒருநாள் மட்டுமே நடைபெறும் என சம்மேளனம் தெரிவித்துள்ளது. அரசு தரப்பில் பேச்சுவார்த்தை அல்லது புதிய அறிவிப்பு வெளியாகும் பட்சத்தில் வேலைநிறுத்தத்தின் நிலைப்பாட்டில் மாற்றம் ஏற்படுகிறதா என்பதையும் பயணிகள் கவனிக்க வேண்டியது அவசியம்.