சொத்து தகராறு.. அமைச்சர் மரிய வில்சன் சமரச தீர்வு மையத்தில் 2-வது முறையாக ஆஜர்!

குடும்பச் சொத்து தகராறில் தனது சகோதரரையும் அவரது மனைவியையும் தாக்கியதாகத் தொடரப்பட்ட வழக்குத் தொடர்பாக, சென்னை உயர்நீதிமன்ற வளாகத்தில் உள்ள சமரச தீர்வு மையத்தில் நிதித்துறை அமைச்சர் மரிய வில்சன் 2-வது முறையாக ஆஜரானார். குடும்பப் பிரச்சினை என்பதால், இரு தரப்பினருக்கும் இடையே நிலவும் முரண்பாடுகளைச் சமரசமாக முடிவுக்குக் கொண்டுவரும் முயற்சியாக இந்த விசாரணை நடைபெற்று வருகிறது.

நிதித்துறை அமைச்சர் மரிய வில்சனுக்கும் அவரது குடும்பத்தினருக்கும் இடையே நீண்ட நாட்களாகச் சொத்துப் பிரிவு தொடர்பான கருத்து வேறுபாடுகள் இருந்து வந்துள்ளன. இந்தத் தகராறின் போது தனது சகோதரரையும், அவரது மனைவியையும் அமைச்சர் மரிய வில்சன் தாக்கியதாகக் கூறி காவல்துறையில் புகார் அளிக்கப்பட்டு வழக்குப் பதிவு செய்யப்பட்டது.

வழக்கு விசாரணை சென்னை உயர்நீதிமன்றத்திற்கு வந்த நிலையில், இது குடும்பத்திற்குள் நிலவும் பிரச்சினை என்பதால் இரு தரப்பும் பேசிச் சுமுக தீர்வு காணும் வகையில் வழக்கைச் சென்னை சமரச தீர்வு மையத்திற்கு மாற்ற நீதிமன்றம் உத்தரவிட்டது. நீதிமன்ற உத்தரவின்படி, ஏற்கனவே முதல் கட்ட விசாரணை முடிந்த நிலையில், இன்று 2-வது முறையாகச் சென்னை சமரச தீர்வு மையத்தில் அமைச்சர் மரிய வில்சன் நேரில் ஆஜரானார்.

சமரச மைய நடுவர்கள் முன்னிலையில் இரு தரப்பினரிடமும் தனித்தனியாகவும், இணைத்தும் பேச்சுவார்த்தை நடத்தப்பட்டு வருகிறது. குடும்பத் தகராறை சுமுகமாக முடிவுக்குக் கொண்டுவர எடுக்கப்பட்டு வரும் இந்த முயற்சிகள் குறித்து உயர்நீதிமன்றத்தில் விரைவில் அறிக்கை தாக்கல் செய்யப்படும் என எதிர்பார்க்கப்படுகிறது.