10 மாவட்டங்களில் இடி, மின்னலுடன் கனமழைக்கு வாய்ப்பு!

தமிழகத்தின் 10 மாவட்டங்களில் இன்று மிக பலத்த கனமழை பெய்வதற்கான வாய்ப்புகள் உள்ளதாக இந்திய வானிலை ஆய்வு மையம் எச்சரிக்கை விடுத்துள்ளது. இந்தச் சூழ்நிலையில் கன்னியாகுமரி, தென்காசி, தூத்துக்குடி, திருச்சி மற்றும் கோயம்புத்தூர் ஆகிய மாவட்டங்களில் நேற்று நள்ளிரவில் இருந்தே இடி மற்றும் மின்னலுடன் கூடிய பலத்த மழை தொடர்ந்து வெளுத்து வாங்கி வருகிறது. இதனால் இந்த மாவட்டங்களின் முக்கியச் சாலைகள் மற்றும் தாழ்வான பகுதிகளில் மழைநீர் பெருக்கெடுத்து ஓடுவதால் மக்களின் இயல்பு வாழ்க்கை சற்றுப் பாதிக்கப்பட்டுள்ளது.

கோடை விடுமுறை முடிந்து பள்ளிகள் கடந்த வாரம் தான் திறக்கப்பட்ட நிலையில், தற்போது பெய்து வரும் இந்தத் தொடர் மழையால் பள்ளிக்குச் செல்லும் சிறிய குழந்தைகள் மற்றும் மாணவ-மாணவிகள் பெரும் சிரமத்திற்கு ஆளாகியுள்ளனர். குறிப்பாகப் பலத்த காற்று மற்றும் இடி மின்னல் காரணமாகக் குழந்தைகளைப் பள்ளிக்கு அனுப்புவதற்குப் பெற்றோர்கள் தற்போதே தயக்கம் காட்டி வருகின்றனர். இதனால் அசம்பாவிதங்கள் ஏதும் நடக்கும் முன்பாக, மாணவர்களின் நலனைக் கருத்தில் கொண்டு முன்னெச்சரிக்கை நடவடிக்கைகளை மேற்கொள்ள வேண்டும் எனப் பெற்றோர்கள் கோரிக்கை விடுத்துள்ளனர்.

இதன் காரணமாக, மழையின் தாக்கம் அதிகமாக இருக்கும் குறிப்பிட்ட அந்தந்த மாவட்டங்களில் உள்ள பள்ளிகளுக்கு இன்று ஜூன் 8ம் தேதி திங்கள் கிழமை முறைப்படி விடுமுறை அறிவிக்கப்பட வேண்டும் எனப் பெற்றோர்கள் சமூக வலைத்தளங்கள் வாயிலாகத் தங்களின் கோரிக்கைகளைத் தீவிரமாக எழுப்பி வருகின்றனர். மாவட்ட நிர்வாகங்கள் சூழ்நிலையைக் கண்காணித்து உரிய முடிவை விரைந்து அறிவிக்க வேண்டும் என்பதும் அவர்களின் எதிர்பார்ப்பாக உள்ளது