ரஜினியின் பெயரையோ, புகைப்படத்தையோ பயன்படுத்த தடை - பரபரப்பு அறிக்கை!

சூப்பர் ஸ்டார் ரஜினிகாந்தின் பெயர், புகைப்படம் மற்றும் அவரது ரசிகர் மன்றக் கொடி ஆகியவற்றை எந்தவொரு அரசியல் கட்சியோ அல்லது அமைப்போ தங்களின் சுயலாபத்திற்காகப் பயன்படுத்தக் கூடாது என்று அகில இந்திய ரஜினி ரசிகர் மன்றம் இன்று எச்சரிக்கை அறிக்கை ஒன்றை வெளியிட்டுள்ளது.

தமிழகத்தில் சமீபத்தில் சட்டமன்றத் தேர்தல் முடிந்து புதிய அரசியல் சூழல் நிலவி வரும் நிலையில், பல்வேறு அரசியல் கட்சிகள் மற்றும் பல்வேறு அமைப்புகள் தங்களின் பொதுக்கூட்ட சுவரொட்டிகள், விளம்பரங்கள் மற்றும் சமூக வலைதளப் பிரச்சாரங்களில் நடிகர் ரஜினிகாந்தின் நிழற்படங்களையும், அவரது ரசிகர் மன்றக் கொடிகளையும் பயன்படுத்தி வருவதாகக் புகார்கள் எழுந்தன.

இதனைத் தொடர்ந்து, நடிகர் ரஜினிகாந்தின் நேரடி உத்தரவின் பேரில், அகில இந்திய ரஜினி ரசிகர் மன்றத்தின் தலைமை நிர்வாகி சம்பத்குமார் இன்று அதிகாரப்பூர்வமான கண்டன அறிக்கை ஒன்றை வெளியிட்டுள்ளார்.

அந்த அறிக்கையில், "ரஜினிகாந்த் அவர்களின் அனுமதி இல்லாமலும், அவரது ஒப்புதல் பெறாமலும் எந்தவொரு அரசியல் கட்சியோ, பொது அமைப்போ அல்லது தனிநபர்களோ தங்களது சுயநல அரசியல் ஆதாயத்திற்காகவோ அல்லது விளம்பரத்திற்காகவோ அவரது பெயரையோ, புகைப்படத்தையோ அல்லது அகில இந்திய ரஜினி ரசிகர் மன்றத்தின் அதிகாரப்பூர்வக் கொடியையோ எக்காரணம் கொண்டும் பயன்படுத்தக் கூடாது" என்று திட்டவட்டமாகத் தெரிவிக்கப்பட்டுள்ளது.

மேலும், இந்த உத்தரவையும் மீறி ரஜினியின் அடையாளங்களைத் தங்களின் சுயலாபத்திற்காகப் பயன்படுத்துபவர்கள் மீது, அறிவுசார் சொத்துரிமைச் சட்டம் மற்றும் சிவில், கிரிமினல் சட்டப் பிரிவுகளின் கீழ் நீதிமன்றத்தின் மூலம் கடுமையான சட்டப்பூர்வ நடவடிக்கைகள் எடுக்கப்படும் என்றும் அந்த எச்சரிக்கை அறிக்கையில்  எச்சரிக்கப்பட்டுள்ளது.

தான் ஏற்கனவே தீவிர அரசியலில் ஈடுபடப் போவதில்லை என்று அறிவித்து ஒதுங்கியுள்ள நிலையில், தற்போதைய சூழலில் அரசியல் கட்சிகள் தனது பெயரைப் பயன்படுத்தி அரசியல் ஆதாயம் தேட முயல்வதைத் தடுத்து நிறுத்தவே ரஜினிகாந்த் இந்த முடிவை எடுத்துள்ளதாக அவரது மன்ற வட்டாரங்கள் தெரிவிக்கின்றன.