தீவிரமடையும் பருவமழை... மும்பைக்கு ரெட் அலெர்ட்!

மகாராஷ்டிர மாநிலத்தின் தலைநகரான மும்பை மற்றும் அதன் சுற்றுவட்டாரப் பகுதிகளில், கடந்த சில நாட்களாக நிலவி வந்த கடுமையான வெயிலின் தாக்கத்திற்குப் பிறகு தென்மேற்குப் பருவமழையானது தீவிரமடைந்துள்ளது. இதன் காரணமாக அங்குள்ள பல்வேறு சாலைகள் மற்றும் தாழ்வான பகுதிகளில் மழைநீர் வெள்ளம்போல் சூழ்ந்து காணப்படுகிறது. மழையின் தீவிரத்தைக் கருத்தில் கொண்டு மும்பை மற்றும் அருகேயுள்ள பால்கர் மாவட்டத்திற்கு இந்திய வானிலை ஆய்வு மையம் ரெட் அலர்ட் விடுத்து எச்சரிக்கை விடுத்துள்ளது. இந்த புதிய கால நிலை மாற்றத்தால் கோடை வெப்பத்தில் தவித்த ஏழை எளிய நடுத்தர மக்கள் மற்றும் நுகர்வோர்கள் பெரும் நிம்மதி அடைந்துள்ளனர்.

வழக்கமாக ஜூன் 10-ஆம் தேதி தொடங்க வேண்டிய இந்த தென்மேற்குப் பருவமழையானது, நடப்பாண்டில் சுமார் 13 நாட்கள் வரை தாமதமாகத் தொடங்கியுள்ளதாக அதிகாரிகள் தரப்பில் தெரிவிக்கப்பட்டுள்ளது. மும்பையில் நேற்று மூன்றாவது நாளாகக் கொட்டித் தீர்த்த கனமழையால் நகரின் முக்கியச் சாலைகள் மற்றும் பொதுப் போக்குவரத்துச் சேவைகளில் எவ்விதப் பெரிய பாதிப்புகளும் ஏற்படவில்லை.

எனினும் இடி, மின்னலுடன் கூடிய தீவிர மழை பெய்யக்கூடும் என்பதால் மணிக்கு 40 முதல் 60 கி.மீ. வேகத்தில் பலத்த காற்று வீசக்கூடும் என வானிலை மையம் எச்சரித்துள்ளது.மேலும் மும்பையை ஒட்டியுள்ள தானே மாவட்டத்திற்கு ஆரஞ்சு அலர்ட்டும், ராய்காட், ரத்னகிரி மாவட்டங்களுக்கு மஞ்சள் அலர்ட்டும் விடுக்கப்பட்டு பொதுமக்கள் பாதுகாப்பாக இருக்குமாறு அறிவுறுத்தப்பட்டுள்ளனர். மாநகராட்சி நிர்வாகத்தின் சார்பில் பேருந்துகள் மற்றும் பொதுப் போக்குவரத்து வாகனங்கள் வழக்கம் போல இயக்கப்பட்டு வருவதாகத் தகவல் வெளியாகியுள்ளது.