மத்திய அமைச்சரவையில் மாற்றம்.. எல்.முருகன் பதவி காலி?!

மத்திய தகவல் ஒலிபரப்பு மற்றும் நாடாளுமன்ற விவகாரங்கள் துறை இணையமைச்சர் எல்.முருகனைப் பதவியிலிருந்து மாற்றக் கோரி பா.ஜ.க.வின் முக்கியத் தரப்பினர் மத்திய உள்துறை அமைச்சர் அமித்ஷாவிடம் கோரிக்கை விடுத்துள்ளதாகத் தகவல்கள் வெளியாகி அரசியல் வட்டாரத்தில் பெரும் பரபரப்பை ஏற்படுத்தியுள்ளன.

பா.ஜ.க.வின் மூத்த தலைவர்களில் ஒருவரான எல்.முருகன் மீது கட்சியின் தேசியத் தலைமை நீண்டகாலமாகப் பெருமதிப்பும், அதிக நம்பிக்கையும் வைத்துள்ளது. தமிழக பா.ஜ.க. தலைவராக இருந்த எல்.முருகனுக்கு, மத்திய அமைச்சர் பதவி வழங்கப்பட்டதோடு மட்டுமின்றி, தமிழகத்தில் நடைபெற்ற முந்தைய சட்டமன்றத் தேர்தல்களிலும், நாடாளுமன்றத் தேர்தல்களிலும் போட்டியிடுவதற்கான நல்வாய்ப்புகள் கட்சித் தலைமையால் தொடர்ந்து வழங்கப்பட்டன.

எனினும், இந்தத் தேர்தல் களங்களில் அவரால் எதிர்பார்த்த வெற்றியைப் பெற முடியவில்லை. இதன் காரணமாக, மக்கள் மத்தியில் அவருக்குப் போதிய அளவிலான நேரடிச் செல்வாக்கு இல்லை என்ற விவாதம் தற்போது பா.ஜ.க.வின் உள்வட்டாரங்களில் தீவிரமாக எழுந்துள்ளதாகக் கூறப்படுகிறது.

தேர்தல் தோல்விகள் மற்றும் கட்சியின் எதிர்கால நகர்வுகளைக் கணக்கில் கொண்டு, பா.ஜ.க.வின் முக்கியப் பிரமுகர்கள் மற்றும் தமிழகப் பிரதிநிதிகள் சிலர் டெல்லி அளவில் காய்களை நகர்த்தத் தொடங்கியுள்ளதாகத் தெரிகிறது. எல்.முருகனுக்குப் பதிலாகத் தமிழகத்தைச் சேர்ந்த வேறொரு ஆளுமைக்கு மத்திய அமைச்சரவையில் வாய்ப்பளிக்க வேண்டும் என்ற கோரிக்கையை, கட்சியின் முக்கியத் தரப்பினர் மத்திய அமைச்சர் அமித்ஷாவிடம் நேரடியாகவே கொண்டு சென்றுள்ளதாகத் நம்பத்தகுந்த வட்டாரங்கள் தெரிவிக்கின்றன.

வரவிருக்கும் மத்திய அமைச்சரவை மாற்றத்தின் போது எல்.முருகனின் பதவிக்கு ஏதேனும் மாற்றம் வருமா அல்லது தேசியத் தலைமை அவர் மீதான நம்பிக்கையைத் தொடர்ந்து நீடிக்குமா என்பது வரும் நாட்களிலேயே தெரியவரும்.