பெரம்பூரில் நெகிழ்ச்சி.. ரேஷன் கடைக்கு நடந்தே சென்று புதிய ரேஷன் கார்டுகள், பட்டாக்களை வழங்கிய முதலமைச்சர் விஜய்!

சென்னை பெரம்பூர் தொகுதிக்கு இன்று வருகை தந்துள்ள முதலமைச்சர் விஜய், தனது புதிய சட்டமன்ற உறுப்பினர்  அலுவலகத்தைத் திறந்து வைத்ததைத் தொடர்ந்து, தொகுதி மக்களிடையே நெகிழ்ச்சியூட்டும் வகையில் மக்கள் நலத்திட்ட உதவிகளை வழங்கியுள்ளார்.

சட்டமன்றத் தேர்தல் வெற்றிக்குப் பிறகு முதன்முறையாகத் தனது சொந்த தொகுதியான பெரம்பூருக்கு வருகை தந்துள்ள முதலமைச்சர் விஜயைக் காண ஆயிரக்கணக்கான பொதுமக்கள் மற்றும் தவெக தொண்டர்கள் சாலையின் இருபுறமும் திரண்டிருந்தனர். புதிய எம்.எல்.ஏ அலுவலகத் திறப்பு விழாவை முடித்துக் கொண்ட முதலமைச்சர், தனது ஆடம்பர வாகனங்களைப் பயன்படுத்தாமல், அங்கிருந்து அருகில் உள்ள நியாயவிலைக் கடைக்கு பொதுமக்களுக்கு இடையே மிக எளிமையாக நடந்தே சென்றார். முதலமைச்சரின் இந்த எளிய செயல் தொகுதி மக்களிடையே பெரும் வரவேற்பைப் பெற்றது. நியாயவிலைக் கடைக்குச் சென்ற முதலமைச்சர் விஜய், அங்குப் புதிய கூட்டுறவுத் திட்டங்களின் செயல்பாடுகளை ஆய்வு செய்தார்.

தகுதிவாய்ந்த பயனாளிகளுக்குப் புதிய ஸ்மார்ட் ரேஷன் கார்டுகளை அவர் தனது கைகளால் நேரடியாக வழங்கி, விநியோகத் திட்டத்தைத் தொடங்கி வைத்தார். ரேஷன் கார்டுகளுடன் சேர்த்து, பெரம்பூர் தொகுதியில் நீண்ட நாட்களாகக் குடியிருந்து பட்டா கிடைக்காமல் தவித்த எளிய குடும்பங்களுக்கு, அரசின் வருவாய்த்துறை மூலம் தயார் செய்யப்பட்ட புதிய நிலப் பட்டாக்களையும் அவர் பயனாளிகளுக்கு வழங்கினார்.

தொகுதி மக்களுக்குத் தேவையான அத்தியாவசியத் தேவைகளை உடனுக்குடன் நிறைவேற்றத் தனது அரசு முன்னுரிமை அளிக்கும் என இந்த நிகழ்வின் போது முதலமைச்சர் விஜய் உறுதியளித்தார். முதலமைச்சரின் இந்தத் திடீர் வருகை மற்றும் நலத்திட்ட உதவிகள் விநியோகத்தால் பெரம்பூர் பகுதி முழுவதும் தற்பொழுது மிகுந்த பரபரப்புடன் காணப்படுகிறது.