பருவமழைக்கு முன் நெல் பாதுகாப்பு.. தலைமைச் செயலகத்தில் 3 துறை அமைச்சர்கள் அவசர ஆலோசனை!

தமிழகத்தில் தென்மேற்குப் பருவமழை விரைவில் தொடங்கவுள்ள நிலையில், விவசாயிகள் அறுவடை செய்யும் நெல்மணிகளை எவ்விதப் பாதிப்பும் இன்றி பாதுகாப்பாகக் கொள்முதல் செய்வது குறித்த முக்கிய முத்தரப்பு ஆலோசனைக் கூட்டம் சென்னை தலைமைச் செயலகத்தில் நேற்று நடைபெற்றது.

அறுவடை செய்யப்படும் நெல்மணிகளை நேரடி நெல் கொள்முதல் மையங்கள் மூலம் விரைவாகக் கொள்முதல் செய்தல், மழையில் நனையாமல் பாதுகாப்பாக வைத்தல் மற்றும் அவற்றை உடனுக்குடன் அரவைக்கு அனுப்புவது குறித்து இந்த உயர் மட்டக் கூட்டத்தில் விரிவாக விவாதிக்கப்பட்டது.

நெல் கொள்முதல் மற்றும் விநியோகச் சங்கிலியில் தொய்வில்லாமல் பணியாற்றுவதற்காக, இந்த ஆய்வுக் கூட்டத்தில் தமிழகத்தின் முக்கிய மூன்று துறைகளின் அமைச்சர்கள் ஒன்றாக இணைந்து ஆலோசனைகளை மேற்கொண்டனர். உணவு மற்றும் உணவுப்பொருள் வழங்கல் துறை அமைச்சர் ப.வெங்கடரமணன்: கொள்முதல் நிலையங்களில் போதிய எண்ணிக்கையில் கோணிப் பைகளைத் தயார் நிலையில் வைப்பது, தார்ப்பாய்களைக் கொண்டு நெல் மூட்டைகளைப் பாதுகாப்பது மற்றும் கொள்முதல் பணிகளைத் துரிதப்படுத்துவது குறித்து அதிகாரிகளுக்கு அறிவுறுத்தினார்.

தொடக்க வேளாண்மைக் கூட்டுறவுச் சங்கங்கள் மூலம் விவசாயிகளுக்குத் தேவையான இதர உதவிகளை வழங்குவது மற்றும் கொள்முதல் மையங்களின் உள்கட்டமைப்பை மேம்படுத்துவது பற்றிப் பேசினார்.

நடப்பு பருவத்தில் மாவட்ட வாரியாக நெல் அறுவடையின் பரப்பளவு மற்றும் விவசாயிகளின் தேவைகளை முன்கூட்டியே கணக்கிட்டு அதற்கேற்ப கொள்முதல் நிலையங்களின் எண்ணிக்கையை அதிகரிக்க வேளாண்மை - உழவர் நலத்துறை அமைச்சர் வினோத் கேட்டுக் கொண்டார்.

பருவமழைக் காலத்தில் கொள்முதல் நிலையங்களில் திறந்தவெளியில் வைக்கப்படும் நெல் மூட்டைகள் நனைந்து வீணாவதாக ஒவ்வொரு ஆண்டும் விவசாயிகளிடமிருந்து புகார்கள் எழுவது வழக்கம். இந்த ஆண்டு அத்தகைய பாதிப்புகள் ஏதும் ஏற்படக் கூடாது என்பதில் அரசு உறுதியாக உள்ளது. இதற்காக, நெல்மணிகளைத் தங்கு தடையின்றி அரவை ஆலைகளுக்கு உடனுக்குடன் நகர்த்துவதற்கும், சேமிப்புக் கிடங்குகளில் போதிய இடவசதியை முன்கூட்டியே உறுதி செய்வதற்கும் மூன்று துறைகளும் ஒருங்கிணைந்து செயல்பட வேண்டும் என இக்கூட்டத்தில் அதிகாரிகளுக்குக் கடுமையான உத்தரவுகள் பிறப்பிக்கப்பட்டுள்ளன. அரசின் இந்த முன்கூட்டிய பாதுகாப்பு நடவடிக்கை நெல் விவசாயிகளிடையே பெரும் நிம்மதியை ஏற்படுத்தியுள்ளது.