அரிசி ஆலையில் பயங்கரம்... எந்திரத்தில் சேலை சிக்கிய விபத்தில் பெண் தொழிலாளி பரிதாப பலி!

திருவண்ணாமலை மாவட்டம் ஆரணியை அடுத்த ராட்டினமங்கலம் ஊராட்சிக்கு உட்பட்ட அம்மையப்பட்டு கிராமத்தில் சாகுல் என்பவருக்குச் சொந்தமான தனியார் அரிசி ஆலை  செயல்பட்டு வருகிறது. இந்த ஆலையில் அதே பகுதியைச் சேர்ந்த ரவி என்பவரின் மனைவி சந்திரா என்ற 40 வயது பெண்மணி அன்றாட கூலி வேலை செய்து வந்தார். இவருக்கு ஒரு மகளும், 2 மகன்களும் உள்ள நிலையில், குடும்பச் சூழ்நிலை காரணமாகக் கடந்த சில காலமாக இந்த ஆலைப்பணியில் சந்திரா ஈடுபட்டு வந்துள்ளார்.

வழக்கம் போல் சந்திரா நேற்று அரிசி ஆலையில் எந்திரங்களுக்கு அருகே தீவிரமாக வேலை செய்து கொண்டிருந்தபோது, திடீரென  அவரது சேலை முந்தானை ஓடிக்கொண்டிருந்த பெரிய எந்திர சக்கரத்தில் சிக்கியுள்ளது. கண் இமைக்கும் நேரத்தில் எந்திரம் சந்திராவை பலமாக இழுத்ததில், அவரது தலை மற்றும் உடல் பகுதிகளில் கடுமையான ரத்தக் காயங்கள் ஏற்பட்டு அலறியுள்ளார். இச்சத்தம் கேட்டு ஓடிவந்த சக தொழிலாளர்கள் எந்திரத்தை உடனடியாக நிறுத்திவிட்டு, அவரை மீட்டுச் சிகிச்சைக்காக ஆரணி அரசு மருத்துவமனைக்குக் கொண்டு சென்றனர்.

அங்கு சந்திராவை தீவிரமாகப் பரிசோதித்த அவசரப் பிரிவு மருத்துவர்கள், அவர் ஏற்கனவே பரிதாபமாக உயிரிழந்துவிட்டதாகத் தெரிவித்துக் குடும்பத்தினருக்குப் பெரும் அதிர்ச்சி கொடுத்தனர். இக்கோர விபத்து குறித்து சந்திராவின் கணவர் ரவி அளித்த புகாரின் பேரில் ஆரணி தாலுகா போலீஸ் இன்ஸ்பெக்டர் சுந்தரேசன் மற்றும் சப்-இன்ஸ்பெக்டர் ஆனந்தன் ஆகியோர் வழக்குப் பதிவு செய்துள்ளனர். அரிசி ஆலை எந்திரத்தில் ஆடை சிக்கிப் பெண் தொழிலாளி சம்பவ இடத்திலேயே பலியான துயரச் சம்பவம் அந்தப் பகுதி மக்களிடையே பெரும் சோகத்தையும் பரபரப்பையும் ஏற்படுத்தியுள்ளது.