நெதர்லாந்தின் இளம் பிரதமராக பதவியேற்றார் ராப் ஜெட்டன்... வரலாற்றில் புதிய சாதனை!

நெதர்லாந்து அரசியலில் ஒரு புதிய சகாப்தம் தொடங்கியுள்ளது. அந்த நாட்டின் வரலாற்றிலேயே மிகக் குறைந்த வயதில் பிரதமராகும் சாதனையை 38 வயதான ராப் ஜெட்டன் படைத்துள்ளார். கடந்த திங்கட்கிழமை ஆம்ஸ்டர்டாமில் உள்ள அரச மாளிகையில் நடைபெற்ற பிரம்மாண்ட விழாவில், நெதர்லாந்து அரசர் வில்லெம்-அலெக்சாண்டர், ராப் ஜெட்டனுக்கு பதவிப் பிரமாணம் செய்து வைத்தார்.

நெதர்லாந்து தேர்தல் முடிந்து சுமார் 117 நாட்களாகப் புதிய அரசு அமைப்பதில் இழுபறி நீடித்தது. பல்வேறு கட்ட பேச்சுவார்த்தைகளுக்குப் பிறகு, ஒரு வழியாகக் கூட்டணி உடன்பாடு எட்டப்பட்டு ராப் ஜெட்டன் பிரதமராகத் தேர்வு செய்யப்பட்டார். 150 இடங்களைக் கொண்ட நெதர்லாந்து நாடாளுமன்றத்தில், தற்போதைய ராப் ஜெட்டன் தலைமையிலான கூட்டணிக்கு 66 இடங்கள் மட்டுமே உள்ளன. இது ஒரு சிறுபான்மை அரசாகும்.

பெரும்பான்மை இல்லாத காரணத்தால், ஒவ்வொரு புதிய சட்டத்தையும் அல்லது திட்டத்தையும் நிறைவேற்ற எதிர்க்கட்சிகளின் ஆதரவைப் பெற வேண்டிய கட்டாயத்தில் ராப் ஜெட்டன் உள்ளார். இது அவரது அரசியல் சாதுர்யத்திற்கு ஒரு பெரிய சோதனையாக அமையும் என எதிர்பார்க்கப்படுகிறது.

சுற்றுச்சூழல் மற்றும் எரிசக்தித் துறையில் ஏற்கனவே அமைச்சராகப் பணியாற்றிய அனுபவம் கொண்டவர் ராப் ஜெட்டன். காலநிலை மாற்றத்திற்கு எதிரான இவரது தீவிர செயல்பாடுகள் ஐரோப்பிய அளவில் இவருக்கு ஒரு தனி அடையாளத்தைப் பெற்றுத் தந்துள்ளன. தற்போது மிக இளம் வயதில் பிரதமர் பொறுப்பை ஏற்றுள்ள இவருக்குப் பல்வேறு உலகத் தலைவர்கள் தங்களது வாழ்த்துகளைத் தெரிவித்து வருகின்றனர்.