37 ஆண்டுகால சாதனையைத் தவிடு பொடியாக்கும் ரோஹித் சர்மா!

தரம்சாலாவில் இன்று நடைபெறும் ஆப்கானிஸ்தானுக்கு எதிரான முதலாவது ஒருநாள் போட்டியில் களம் இறங்குவதன் மூலம், இந்திய கிரிக்கெட் அணியின் முன்னாள் கேப்டன் ரோஹித் சர்மா 37 ஆண்டுகால வரலாற்றுச் சாதனை ஒன்றை முறியடித்துப் புதிய மைல்கல்லை எட்டவுள்ளார்.

இந்திய அணியின் நட்சத்திரத் தொடக்க ஆட்டக்காரரான ரோஹித் சர்மாவுக்கு தற்போது 39 வயது 44 நாட்கள் ஆகிறது. இன்று ஆப்கானிஸ்தான் அணிக்கு எதிரான ஒருநாள் போட்டியில் அவர் விளையாடுவதன் மூலம், "ஒருநாள் கிரிக்கெட் வரலாற்றில் இந்தியாவிற்காக விளையாடிய மிக வயதான வீரர்" என்ற வரலாற்றுப் பெருமையைப் பெறுகிறார்.

இதற்கு முன்னதாக, கடந்த 1989-ஆம் ஆண்டில் இந்திய அணியின் ஜாம்பவான் மொஹிந்தர் அமர்நாத் தனது 38 வயதில் விளையாடியதே கடந்த 37 ஆண்டுகளாக முறியடிக்கப்படாத சாதனையாக நீடித்து வந்தது. தற்போது அதனைத் தவிடு பொடியாக்கி, கடந்த 52 ஆண்டு கால ஒருநாள் கிரிக்கெட் வரலாற்றில் இந்தியாவின் மிக வயதான ஒருநாள் போட்டி வீரராக ரோஹித் சர்மா உருவெடுத்துள்ளார்.

சமீபத்தில் ஐபிஎல் போட்டியின் போது ஏற்பட்ட தசைப்பிடிப்பு காயம் காரணமாக ஓய்வில் இருந்த ரோஹித் சர்மா, பெங்களூருவில் உள்ள பிசிசிஐ-யின் தேசிய கிரிக்கெட் அகாடமியில் தனது உடற்தகுதித் தேர்வில் தேர்ச்சி பெற்று தற்போதைய ஒருநாள் தொடரில் இணைந்துள்ளார். விராட் கோலி, ஹர்திக் பாண்டியா போன்ற சீனியர் வீரர்கள் காயத்தால் இந்தத் தொடரில் இருந்து விலகியுள்ளதால், ரோஹித்தின் வருகை தற்போதைய கேப்டன் சுப்மன் கில் தலைமையிலான இளம் இந்திய அணிக்கு பெரும் பலமாக அமைந்துள்ளது.

ஏற்கனவே ஆப்கானிஸ்தான் அணிக்கு எதிராக நடைபெற்ற ஒரே ஒரு டெஸ்ட் போட்டியில், இந்திய அணி இன்னிங்ஸ் மற்றும் 300 ரன்கள் வித்தியாசத்தில் வரலாற்று வெற்றியைப் பதிவு செய்து அசத்தியிருந்தது. அதனைத் தொடர்ந்து, இன்று தரம்சாலாவில் தொடங்கும் 3 போட்டிகள் கொண்ட ஒருநாள் தொடரையும் கைப்பற்றும் முனைப்பில் இந்திய அணி களம் காண்கிறது. இந்தச் சூழலில் ரோஹித் சர்மா படைக்கவுள்ள இந்த புதிய உலக சாதனை ரசிகர்களைக் கொண்டாட வைத்துள்ளது.