கல்லூரி மாணவிகளுக்கு மாதந்தோறும் ரூ.1,000 நிதியுதவி - கேரளாவில் நடைமுறைக்கு வந்தது!

இந்தியாவின் கல்வி மற்றும் சமூகப் பொருளாதார வளர்ச்சியில் முன்னோடி மாநிலங்களாக விளங்கும் தென் மாநிலங்கள், பெண்கல்வியை ஊக்குவிப்பதற்கான பல்வேறு ஆக்கப்பூர்வமான திட்டங்களை அறிமுகப்படுத்தி வருகின்றன. அந்த வகையில், தமிழ்நாட்டில் அரசுப் பள்ளிகளில் படித்துக் கல்லூரிக்குச் செல்லும் மாணவிகளின் உயர்கல்வியை உறுதி செய்யும் நோக்கில் வெற்றிகரமாகச் செயல்படுத்தப்பட்டு வரும் மாதாந்திர நிதியுதவித் திட்டத்தின் அடிப்படையில், தற்போதுஅண்டை மாநிலமான கேரளத்திலும் புதிய கல்வித் திட்டம் ஒன்று அறிமுகம் செய்யப்பட்டுள்ளது.

கேரள மாநிலத்தில் ஆட்சிப் பொறுப்பில் இருக்கும் காங்கிரஸ் கூட்டணி அரசு, அங்குள்ள கல்லூரி மாணவிகளின் கல்விச் செலவுகளுக்குத் துணை நிற்கும் வகையில் மாதம் 1,000 ரூபாய் கல்வி உதவித்தொகை வழங்கும் புதிய சமூக நலத்திட்டத்தை அதிகாரப்பூர்வமாக அறிவித்துள்ளது. இந்தத் திட்டம் நடப்பு கல்வியாண்டு (2026-2027) முதலே மாநிலம் முழுவதும் உள்ள அனைத்து அரசு மற்றும் அரசு உதவி பெறும் கல்லூரிகளில் பயிலும் தகுதியான மாணவிகளுக்குத் தங்கு தடையின்றிச் செயல்படுத்தப்படும் என்று கேரள மாநில உயர் கல்வித்துறை அமைச்சர் ரோஜி எம்.ஜான் தனது செய்திக்குறிப்பில் விரிவாகத் தெரிவித்துள்ளார்.

பெண்கல்வி இடைநிற்றலைத் தவிர்ப்பதற்கும், கிராமப்புற மாணவிகள் தங்களது பொருளாதாரச் சுமைகளைப் பொருட்படுத்தாமல் உயர்கல்வியைத் தொடர்வதற்கும் இந்த மாதாந்திர நிதியுதவிப் பெரும் பங்களிப்பை வழங்கும் என அம்மாநில அரசு நம்புகிறது. தமிழ்நாட்டில் கடந்த திமுக ஆட்சிப் பொறுப்பின் போது, அரசுப் பள்ளிகளில் பயின்று உயர்கல்விக்குச் செல்லும் மாணவ, மாணவிகளின் நலன் கருதி மாதம் 1,000 ரூபாய் வழங்கும் புதுமைப் பெண் மற்றும் தமிழ்ப்புதல்வன் ஆகிய முன்னோடித் திட்டங்கள் தொடங்கப்பட்டு வெற்றிகரமாகச் செயல்பட்டு வருவது குறிப்பிடத்தக்கது. தமிழ்நாட்டின் இந்த  கல்வி மாதிரியை கேரள அரசும் தனது மாநிலத்தில் முறைப்படி பின்பற்றி நடைமுறைப்படுத்தத் தொடங்கியுள்ளது பெரும் வரவேற்பைப் பெற்றுள்ளது.