தமிழகத்திற்கு ரூ.15,300 கோடி முதலீடு.. இன்று காலை 8 மணிக்கு சென்னை திரும்புகிறார் முதல்வர் விஜய்!

தொழில் முதலீடுகளை ஈர்ப்பதற்காக லண்டன் சென்ற தமிழக முதலமைச்சர் விஜய், தனது அரசு முறைப் பயணத்தை வெற்றிகரமாக நிறைவு செய்துவிட்டு இன்று காலை சென்னை திரும்புகிறார். இவரது இந்தப் பயணத்தின் மூலம் தமிழ்நாட்டிற்கு ரூ.15,300 கோடிக்கும் அதிகமான முதலீடுகள் ஈர்க்கப்பட்டுள்ளதாகத் தமிழக அரசு அதிகாரப்பூர்வமாக அறிவித்துள்ளது.

முதலமைச்சரான பிறகு விஜய் மேற்கொண்ட முதல் வெளிநாட்டுப் பயணம் இதுவாகும். கடந்த செப்டம்பர் 10-ஆம் தேதி லண்டன் சென்ற அவர், அங்குள்ள உலகப் புகழ்பெற்ற சில்வர்ஸ்டோன் ஓடுதளத்தில் நடைபெற்ற 'லீ மான்ஸ்' கோப்பை கார் பந்தயத்தைச் சிறப்பு விருந்தினராகப் பங்கேற்றுத் தொடங்கி வைத்தார். இந்த பந்தயத்தில் நடிகர் அஜித்குமார் மற்றும் அவரது அணியினர் கலந்துகொண்டு மூன்றாவது இடத்தைப் பிடித்தனர்.

கடந்த செப்டம்பர் 14 அன்று லண்டனில் முதலமைச்சர் விஜய் முன்னிலையில், தமிழக அரசின் 'வழிகாட்டி' நிறுவனத்திற்கும் முன்னணி உலகளாவிய நிறுவனங்களுக்கும் இடையே பல்வேறு முக்கிய ஒப்பந்தங்கள் கையெழுத்தாகின.

சம்வர்தனா மதர்சன் இன்டர்நேஷனல்: ஐரோப்பிய மற்றும் பிரிட்டன் கூட்டு நிறுவனங்களுடன் இணைந்து ரூ.11,000 கோடி முதலீட்டில் வடிவமைப்பு, பொறியியல் மற்றும் உற்பத்தி ஆலைகளை அமைக்க ஒப்பந்தம் கையெழுத்தாகியுள்ளது. இதன் மூலம் சுமார் 7,000 பேருக்கு வேலைவாய்ப்பு கிடைக்கும்.

வாகன உதிரிபாக ஆலை: முன்னணி ஐரோப்பிய வாகன உதிரிபாக தயாரிப்பு நிறுவனம் இந்தியாவில் தனது முதல் புதிய உற்பத்தி ஆலையைத் தமிழகத்தில் அமைக்க ரூ.3,000 கோடி முதலீட்டுக்கான விருப்பக் கடிதத்தை வழங்கியுள்ளது.

வில்சன் பவர் சொல்யூஷன்ஸ்: திருவள்ளூரில் மின்மாற்றி உற்பத்திப் பணிகளுக்காக ரூ.300 கோடி முதலீடு செய்யப்பட உள்ளது. இதன் மூலம் 400 பேருக்கு வேலைவாய்ப்பு கிடைக்கும்.

திறன் மையங்கள்: சிக்மா டெக்னாலஜி குழுமம் மற்றும் எர்ன்ஸ்ட் அண்ட் யங்  நிறுவனங்கள் மூலம் தொழில்நுட்ப மற்றும் உலகளாவிய திறன் மையங்கள் அமைக்கப்படுவதன் வழியாக ஆயிரக்கணக்கான உயர் மதிப்புமிக்க வேலைவாய்ப்புகள் உருவாக்கப்பட உள்ளன.

இந்த ஒப்பந்தங்கள் மற்றும் நோக்கக் கடிதங்கள் மூலம் ஒட்டுமொத்தமாக ரூ.15,300 கோடிக்கும் அதிகமான முதலீடுகள் திரட்டப்பட்டுள்ளதோடு, 10,000-க்கும் மேற்பட்டோருக்கு நேரடி மற்றும் மறைமுக வேலைவாய்ப்புகள் உருவாகும் என எதிர்பார்க்கப்படுகிறது. வரும் 2036-ஆம் ஆண்டுக்குள் தமிழகத்தை 1.5 டிரில்லியன் டாலர் பொருளாதாரமாக மாற்றும் அரசின் இலக்கிற்கு இந்தப் பயணம் மேலும் வலு சேர்த்துள்ளது.