ரூ.95,692 கோடி நிதி ஒதுக்கீடு... நாடு முழுவதும் ஜூலை 1 முதல் அமல்... 100 நாள் வேலைத்திட்டம் இனி 125 நாட்களாக உயர்வு!

மகாத்மா காந்தி தேசிய ஊரக வேலைவாய்ப்பு உறுதித் திட்டத்திற்கு மாற்றாக, மத்திய அரசால் கொண்டு வரப்பட்ட வரலாற்றுச் சிறப்புமிக்க புதிய "விக்சித் பாரத் கிராம வேலைவாய்ப்பு மற்றும் வாழ்வாதார உத்தரவாத சட்டம்" வரும் ஜூலை 1-ஆம் தேதி முதல் நாடு முழுவதும் அமலுக்கு வருகிறது. இப்புதிய திட்டத்தின் கீழ் கிராமப்புறத் தொழிலாளர்களுக்கான வேலை நாள்கள் அடியோடு அதிகரிக்கப்பட்டுள்ளன.

கடந்த 2025 டிசம்பரில் நாடாளுமன்றத்தில் நிறைவேற்றப்பட்ட இப்புதிய சட்டத்தின்படி, இதுவரை நடைமுறையிலிருந்த 100 நாள் வேலைவாய்ப்புக்குப் பதிலாக, இனி ஒரு நிதியாண்டில் தகுதியுள்ள ஒவ்வொரு கிராமப்புறக் குடும்பத்திற்கும் 125 நாள்கள் கட்டாய ஊதிய வேலைவாய்ப்பு இச்சட்டத்தின் மூலம் சட்டப்பூர்வமாக உறுதி செய்யப்படுகிறது.

இப்புதிய மெகா திட்டத்தை நாடு முழுவதும் தடையின்றிச் செயல்படுத்துவதற்காக, முதற்கட்ட இடைக்காலப் பங்கீடாக ரூ.95,692 கோடி நிதியை மத்திய அரசு ஒதுக்கீடு செய்துள்ளது. இத்திட்டத்திற்கான ஒட்டுமொத்தச் செலவில் 60 விழுக்காட்டை மத்திய அரசும், 40 விழுக்காட்டை அந்தந்த மாநில அரசுகளும் கூட்டுப் பொறுப்பாக ஏற்க வேண்டும்.

புதிய சட்டத்தின் விதிகளுக்கு இணங்க, மாநில அரசுகள் தங்களது ஊரகப் பகுதிகளில் திட்டங்களை எவ்விதத் தொய்வுமின்றி வடிவமைக்க மத்திய அரசு முழு ஆதரவை வழங்குகிறது. திட்டக் கண்காணிப்பு மற்றும் மாநில அரசுகளுக்குத் தொழில்நுட்ப ஆலோசனைகளை வழங்க நாடு முழுவதும் 100 சிறப்பு மண்டல அதிகாரிகள் மத்திய ஊரக வளர்ச்சி அமைச்சகத்தால் நியமிக்கப்பட்டுள்ளனர்.

திட்டத்தில் வெளிப்படைத்தன்மையை அதிகரிக்கவும், லஞ்ச முறைகேடுகளை முளையிலேயே கிள்ளியெறியவும் டிஜிட்டல் தொழில்நுட்ப மாற்றங்கள் புகுத்தப்பட்டுள்ளன: போலி ஜாப் கார்டுகளை ஒழிக்கும் நோக்கில், அனைத்துப் பயனாளிகளுக்கும் மின்-கேஒய்சி சரிபார்ப்பு முழுமையாக முடிக்கப்பட்டுள்ளது.

முக அங்கீகார வருகைப்பதிவு: வேலைத்தளங்களில் தொழிலாளர்கள் நேரில் வந்து வேலை செய்வதை உறுதி செய்ய, மொபைல் செயலி மூலமாக முக அங்கீகார வருகைப்பதிவு முறை கட்டாயமாக்கப்பட்டுள்ளது. இந்த அதிநவீன டிஜிட்டல் தளங்கள் (ஜிஐஎஸ் புவிசார் கண்காணிப்பு) மற்றும் செயற்கை நுண்ணறிவு மேலாண்மை முறைகளைக் கையாள்வது குறித்து, அனைத்து வட்டார மற்றும் கிராம ஊராட்சி செயலர்களுக்குத் தீவிரப் பயிற்சிகள் வழங்கி முடிக்கப்பட்டுள்ளன.

இப்புதிய திட்டத்தில் விவசாயப் பெருங்குடி மக்களுக்கும், விவசாயக் கூலித் தொழிலாளர்களுக்கும் பயன் தரும் வகையில் ஒரு புதிய முக்கிய விதி சேர்க்கப்பட்டுள்ளது. அதன்படி, கிராமப்புறங்களில் நடவு மற்றும் அறுவடைப் பணிகள் தீவிரமாக நடைபெறும் உச்சக் காலங்களில் (பீக் சீசன்), உள்ளூர் விவசாயிகளுக்குப் போதிய ஆட்கள் கிடைப்பதை உறுதி செய்ய, ஒரு நிதியாண்டில் அதிகபட்சமாக 60 நாள்கள் வரை இத்திட்டப் பணிகளைத் தற்காலிகமாக நிறுத்தி வைக்க மாநில அரசுகளுக்கு முழு சட்டப்பூர்வ அதிகாரம் வழங்கப்பட்டுள்ளது.

வேலை கோரிய 15 நாள்களுக்குள் வேலை வழங்கப்படாவிட்டால், மாநில அரசுகள் தங்களது சொந்த நிதியிலிருந்து தொழிலாளர்களுக்குத் 'வேலையின்மைப் படி' வழங்குவதும் இச்சட்டத்தின் கீழ் கட்டாயமாக்கப்பட்டுள்ளது குறிப்பிடத்தக்கது.