தமிழகத்தில் 128 இடங்களில் ஆர்.எஸ்.எஸ். பேரணி நடத்த உயர்நீதிமன்றம் அனுமதி!

ஆர்.எஸ்.எஸ். அமைப்பின் நூற்றாண்டு விழாவைக் கொண்டாடும் வகையில் இந்தியா முழுவதும் பல்வேறு இடங்களில் பேரணிகள் நடத்த ஏற்பாடுகள் செய்யப்பட்டுள்ளன. இதன் ஒரு பகுதியாக, தமிழ்நாட்டில் உள்ள 128 இடங்களில் அக்டோபர் 25 மற்றும் நவம்பர் 1 ஆகிய தேதிகளில் பேரணி நடத்துவதற்கு அனுமதி கோரி ஆர்.எஸ்.எஸ். மாநிலச் செயலாளர் ஜெகதீஷன் தரப்பில் காவல் துறையிடம் மனு அளிக்கப்பட்டது. ஆனால், உரிய பரிசீலனை செய்யப்படாமல் அனுமதி மறுக்கப்பட்டதாகக் கூறப்பட்டு சென்னை உயர்நீதிமன்றத்தில் வழக்கு தொடரப்பட்டது.

இந்த வழக்கு சென்னை உயர்நீதிமன்ற நீதிபதி லட்சுமி நாராயணன் முன்பு விசாரணைக்கு வந்தது. அப்போது மனுதாரர் தரப்பில் ஆஜரான மூத்த வழக்கறிஞர், "சென்னையில் 400 பேரும், மற்ற மாவட்டங்களில் தலா 100 பேரும் கலந்துகொள்ளும் வகையில்தான் அனுமதி கோரி மனு அளிக்கப்பட்டது. ஆனால், பல்வேறு காரணங்களைக் கூறி காவல்துறை அனுமதி மறுத்துவிட்டது" என வாதிட்டார்.

இதற்குப் பதிலளிக்கும் வகையில் அரசுத் தலைமை வழக்கறிஞர் விஜய் நாராயண் வாதிடுகையில், "நீதிமன்ற உத்தரவுக்குப் பிறகும் கூட 93 இடங்களில் கலந்துகொள்வதற்கான மனு மட்டுமே இதுவரை முறையாக அளிக்கப்பட்டுள்ளது. அதில் குறிப்பிட்ட சில இடங்களில் எத்தனை பேர் கலந்து கொள்வார்கள் மற்றும் எத்தனை வாகனங்கள் பயன்படுத்தப்படும் என்ற விவரங்கள் முழுமையாகத் தெரிவிக்கப்படவில்லை. மேலும், அனுமதி கோரப்பட்ட சில இடங்கள் அதிகப் போக்குவரத்து உள்ள நெரிசலான பகுதிகளாக இருப்பதால் பாதுகாப்பு மற்றும் அனுமதி வழங்குவதில் சிக்கல்கள் உள்ளன" எனத் தெரிவித்தார்.

இரு தரப்பு வாதங்களையும் கவனமாகக் கேட்டறிந்த நீதிபதி, "பேரணிக்கு அனுமதி மறுப்பதன் மூலமாக ஆர்.எஸ்.எஸ். அமைப்புக்கு அரசு மறைமுகமாக விளம்பரம் தேடித்தருகிறது" எனக் குறிப்பிட்டார். மேலும், தமிழ்நாட்டில் குறிப்பிட்ட 128 இடங்களில் அக்டோபர் 25 மற்றும் நவம்பர் 1-ஆம் தேதிகளில் ஆர்.எஸ்.எஸ். பேரணி மற்றும் பொதுக்கூட்டங்களை நடத்த அனுமதி வழங்கி நீதிபதி அதிரடியாக உத்தரவிட்டார்.

அதேவேளையில், பேரணி நடைபெறும் போது எவை எவெைக் செய்யலாம், எவற்றைச் செய்யக் கூடாது என்பது தொடர்பாக ஏற்கெனவே கடந்த 2025-ஆம் ஆண்டு நீதிமன்றம் பிறப்பித்துள்ள அனைத்து நிபந்தனைகளையும் அமைப்பினர் கண்டிப்பாகக் கடைபிடிக்க வேண்டும் என அறிவுறுத்தப்பட்டுள்ளது. மேலும், காவல்துறையினர் விதிக்கும் பாதுகாப்பு நிபந்தனைகளை மீறி ஆர்.எஸ்.எஸ். அமைப்பினர் செயல்பட்டால், அதுகுறித்து காவல்துறை சட்டப்படி தகுந்த நடவடிக்கை எடுக்கலாம் என்றும் நீதிமன்றம் தனது உத்தரவில் தெளிவுபடுத்தியுள்ளது.