தவெக அமைச்சரவையில் இடம் - எஸ்.பி.வேலுமணி விளக்கம்!

முதலமைச்சர் விஜய் தலைமையிலான தவெக அரசு அண்மையில் சட்டமன்றத்தில் நம்பிக்கை வாக்கெடுப்பில் வெற்றி பெற்றதைத் தொடர்ந்து, தமிழக அமைச்சரவை விரிவாக்கம் செய்யப்பட்டுள்ளது. இந்தச் சூழலில், தவெக அமைச்சரவையில் அதிமுக அதிருப்தி குழுவினர் இடம்பெறப் போவதாக வெளியான தகவல்களுக்கு அதிமுக முன்னாள் அமைச்சரும், சட்டமன்ற உறுப்பினருமான எஸ்.பி.வேலுமணி திட்டவட்டமான விளக்கமளித்துள்ளார்.

சென்னையில் இன்று செய்தியாளர்களைச் சந்தித்த அவர், தங்களின் அரசியல் நிலைப்பாடு குறித்தும், பரப்பப்படும் வதந்திகள் குறித்தும் பேசுகையில், தவெக அமைச்சரவையில் தங்களுக்கு இடங்கள் ஒதுக்கப்படாதது குறித்து எழும் விமர்சனங்களுக்குப் பதிலளித்த எஸ்.பி.வேலுமணி, "நாங்கள் தவெக அமைச்சரவையில் இடம்பெறுவோம் என்று எந்தவொரு இடத்திலும், எவரிடமும் கூறவில்லை. பதவிக்காக நாங்கள் தவெக அரசை ஆதரிக்கவில்லை" என்று தெளிவுபடுத்தினார்.

மக்கள் வழங்கிய தீர்ப்பின் அடிப்படையிலும், அவர்களின் நலனைக் கருத்தில் கொண்டுமே தவெக அரசுக்குத் தார்மீக ஆதரவை வழங்கினோம். மறைந்த முதலமைச்சர் ஜெயலலிதா அவர்களின் ஆட்சிக்காலத்தில் கொண்டு வரப்பட்ட 'அம்மா உணவகம்', 'தாலிக்குத் தங்கம்' உள்ளிட்ட ஏழை எளிய மக்களுக்கான நலத்திட்டங்கள் தற்போதைய புதிய அரசிலும் தொய்வின்றித் தொடர வேண்டும் என்பதை மட்டுமே நாங்கள் வலியுறுத்தியுள்ளோம்.

பதவி கிடைக்காததால் தங்களுக்குள் அதிருப்தி நிலவுவதாகச் சிலர் திட்டமிட்டுப் பொய்யான தகவல்களைப் பரப்பி வருவதாகக் குற்றம் சாட்டிய அவர், தங்களின் தற்போதைய ஒரே இலக்கு தமிழகத்தில் மீண்டும் எம்.ஜி.ஆர், ஜெயலலிதா ஆகியோரின் மக்கள் நல்வாழ்வு ஆட்சியை (அதிமுக ஆட்சி) அமைப்பதுதான் என்றும், அதற்காகத் தொடர்ந்து தீவிரமாகப் பாடுபடுவோம் என்றும் செய்தியாளர்கள் சந்திப்பில் உறுதிபடத் தெரிவித்துள்ளார்.