ஓணம் ஸ்பெஷல்... சபரிமலை நடை திறப்பு!

ஓணம் பண்டிகையைக் முன்னிட்டுச் சபரிமலை ஐயப்பன் கோயில் நடை இன்று மாலை 5 மணிக்குத் திறக்கப்படுகிறது. கோயில் தந்திரி கண்டரரு பிரம்மதத்தன் முன்னிலையில் மேல்சாந்தி பிரசாத் நம்பூதிரி நடையைத் திறந்து தீபம் ஏற்றி வைக்கிறார். அதனைத் தொடர்ந்து பதினெட்டாம் படிக்குக் கீழே உள்ள ஆழியில் தீ மூட்டப்படும்.

உத்திராட நாளான நாளை (செவ்வாய்க்கிழமை) காலை 5 மணி முதல் பக்தர்கள் சாமி தரிசனத்திற்கு அனுமதிக்கப்படுவர். உத்திராடம், திருவோணம், அவிட்டம் மற்றும் சதயம் ஆகிய சிறப்பான நாட்களில் கோயிலில் சிறப்புப் பூஜைகளும் வழிபாடுகளும் நடைபெறுகின்றன.

இதனைத் தொடர்ந்து, ஓணம் பண்டிகை நாளான வரும் 26-ஆம் தேதி அன்று சபரிமலைக்குத் தரிசனத்திற்கு வரும் அனைத்துப் பக்தர்களுக்கும் திருவிதாங்கூர் தேவஸ்தானம் சார்பில் பிரம்மாண்டமான முறையில் 'ஓண சத்யா' (ஓண விருந்து) வழங்கப்பட உள்ளது. ஓணம் திருவிழா சிறப்புப் பூஜைகள் அனைத்தும் நிறைவடைந்த பிறகு, வருகிற ஆகஸ்ட் 28-ஆம் தேதி இரவு 10 மணிக்குக் கோயில் நடை அடைக்கப்படும் எனத் தெரிவிக்கப்பட்டுள்ளது.