தமிழ்த் திரையிசையில் கிட்டார் இசை மூலம் தனித்துவம் பெற்ற மூத்த இசைக்கலைஞர் சதா மாஸ்டர் (80) வயது மூப்பு மற்றும் உடல்நலக் குறைவால் இன்று காலமானார். அவரது மறைவு இசை ரசிகர்கள் மற்றும் திரையிசைக் கலைஞர்களிடையே சோகத்தை ஏற்படுத்தியுள்ளது.

மூத்த இசையமைப்பாளர் ஆர். சுதர்சனத்தின் மகனான சதா மாஸ்டர், திரைப்பட இசைத்துறையில் புகழ்பெற்ற கிட்டார் கலைஞராக விளங்கினார். இளையராஜா, தேவா உள்ளிட்ட முன்னணி இசையமைப்பாளர்களின் இசைக்குழுக்களில் பணியாற்றி, பல திரைப்படப் பாடல்களின் இசைக் கோவைக்கு தனது பங்களிப்பை வழங்கியுள்ளார்.

பழம்பெரும் இசை மரபின் தொடர்ச்சி

சதா மாஸ்டரின் தந்தை ஆர். சுதர்சனம், ஏ.வி.எம். நிறுவனத்துடன் இணைந்து பணியாற்றிய புகழ்பெற்ற இசையமைப்பாளர். ‘பராசக்தி’, ‘களத்தூர் கண்ணம்மா’, ‘நாம் இருவர்’ உள்ளிட்ட படங்களில் அவர் அமைத்த இசை, தமிழ்த் திரையிசை வரலாற்றில் குறிப்பிடத்தக்க இடத்தைப் பெற்றுள்ளது.

தந்தையின் இசைப் பாரம்பரியத்தைத் தொடர்ந்து, இசைக்கருவி வாசிப்பில் தனது திறமையால் அடையாளம் பெற்றவர் சதா மாஸ்டர். திரையிசையில் கிட்டார் இசையின் முக்கியத்துவம் உயர்ந்த காலகட்டத்தில் முன்னணி இசைக்கலைஞர்களுடன் இணைந்து பணியாற்றிய அவரது பங்களிப்பு நினைவுகூரத்தக்கது.சதா மாஸ்டரின் மறைவுக்குத் திரையுலகினர் மற்றும் இசை ரசிகர்கள் இரங்கல் தெரிவித்து வருகின்றனர்.