சென்னையில் பரபரப்பு... உதயநிதி தொகுதியில் ₹30 லட்சம் மதிப்பிலான வெள்ளிப் பொருட்கள் பறிமுதல்!

தமிழகத்தில் சட்டமன்றத் தேர்தல் தேதி அறிவிக்கப்பட்டதைத் தொடர்ந்து, மாநிலம் முழுவதும் தேர்தல் நடத்தை விதிகள் மிகத் தீவிரமாக அமல்படுத்தப்பட்டு வருகின்றன. வாக்காளர்களுக்குப் பணமோ அல்லது பரிசுப் பொருட்களோ விநியோகிக்கப்படுவதைத் தடுக்க அமைக்கப்பட்ட பறக்கும் படையினர், சென்னையில் இன்று ஒரு முக்கியப் பறிமுதலைச் செய்துள்ளனர்.

சென்னை மாநகரின் முக்கியத் தொகுதிகளில் ஒன்றான சேப்பாக்கம் - திருவல்லிக்கேணி தொகுதிக்குட்பட்ட பகுதிகளில் தேர்தல் பறக்கும் படையினர் மற்றும் காவல்துறையினர் இன்று தீவிர வாகன சோதனையில் ஈடுபட்டனர். அப்போது ஐஸ் அவுஸ் காவல் நிலையம் அருகே அந்த வழியாக வந்த ஆந்திர மாநிலப் பதிவு எண் கொண்ட ஒரு சொகுசு காரை அதிகாரிகள் தடுத்து நிறுத்திச் சோதனை செய்தனர். இந்த சோதனையின் போது, காரின் உட்பகுதியில் மறைத்து வைக்கப்பட்டிருந்த ஏராளமான வெள்ளிப் பொருட்கள் கண்டறியப்பட்டன. பறிமுதல் செய்யப்பட்ட வெள்ளிப் பொருட்களின் மொத்த மதிப்பு சுமார் ₹30 லட்சம் என அதிகாரிகள் தெரிவித்துள்ளனர்.

இந்தப் பொருட்களைக் கொண்டு வந்த நபரிடம், அவை வாங்கியதற்கான முறையான ரசீதுகளோ அல்லது ஒரு இடத்திலிருந்து மற்றொரு இடத்திற்குக் கொண்டு செல்வதற்கான முறையான ஆவணங்களோ இல்லை. பறிமுதல் செய்யப்பட்ட வெள்ளிப் பொருட்கள் அனைத்தும் உடனடியாகத் தேர்தல் கருவூலத்திற்கு அனுப்பி வைக்கப்பட்டன. இந்த வெள்ளிப் பொருட்கள் எதற்காகக் கொண்டு வரப்பட்டன? ஏதேனும் அரசியல் கட்சியினருக்கு விநியோகிப்பதற்காகக் கொண்டு வரப்பட்டதா? அல்லது வணிக ரீதியான கடத்தலா? என்பது குறித்து வருமான வரித்துறை மற்றும் தேர்தல் அதிகாரிகள் தீவிர விசாரணை நடத்தி வருகின்றனர். துணை முதல்வர் உதயநிதியின் தொகுதியில் வெள்ளிப்பொருட்கள் அதிகளவில் பறிமுதல் செய்யப்பட்டிருப்பதால், வாக்காளர்களுக்கு விநியோகிக்க ஏதேனும் அரசியல் கட்சி சார்பில் கொண்டு வரப்பட்டதா என்கிற கோணத்தில் விசாரணை நடைபெற்று வருகிறது.