மதுரையில் பரபரப்பு.. திருமாவளவன் போஸ்டர் மீது சாணி வீச்சு - காவல் நிலையத்தை முற்றுகையிட்ட விசிகவினர்!

மதுரை கள்ளந்திரி பகுதியில் விடுதலைச் சிறுத்தைகள் கட்சியின் தலைவர் தொல். திருமாவளவனின் போஸ்டர்கள் மீது மர்ம நபர்கள் சாணி மற்றும் கழிவுகளை வீசி அவமதிப்பு செய்துள்ள சம்பவம், அப்பகுதியில் பெரும் அரசியல் பதற்றத்தை ஏற்படுத்தியுள்ளது.

இச்சம்பவம் குறித்துத் தகவல் அறிந்து விரைந்து வந்த காவல் துறையினர், அப்பகுதியில் உள்ள கண்காணிப்புக் கேமரா காட்சிகளை ஆய்வு செய்து முதற்கட்ட விசாரணையை மேற்கொண்டனர். விசாரணையின் முடிவில், இந்த அவமதிப்புச் செயலில் ஈடுபட்டது இரண்டு சிறுவர்கள் தான் என்று காவல் துறை தரப்பில் விளக்கம் அளிக்கப்பட்டது.

இருப்பினும், காவல்துறையின் இந்த விளக்கத்தை விசிக நிர்வாகிகள் மற்றும் தொண்டர்கள் முற்றிலும் ஏற்க மறுத்துவிட்டனர். "இது சிறுவர்கள் தற்செயலாகச் செய்த காரியம் அல்ல; இதன் பின்னணியில் இருந்து கொண்டு அரசியல் உள்நோக்கத்தோடு யாரோ தூண்டிவிட்டுள்ளனர்" என்று விசிகவினர் குற்றம் சாட்டினர். இதனைத் தொடர்ந்து, இந்தச் சம்பவத்தின் பின்னணியில் உள்ள உண்மைக் குற்றவாளிகளைக் கண்டறிந்து உடனடியாகக் கைது செய்ய வேண்டும் என வலியுறுத்தி, கள்ளந்திரி காவல் நிலையத்தை விசிகவினர் திரளாகத் திரண்டு முற்றுகையிட்டு  போராட்டத்தில் ஈடுபட்டனர்.

காவல் நிலைய முற்றுகைப் போராட்டம் காரணமாக அந்தப் பகுதியில் விசிக தொண்டர்கள் குவிந்துள்ளதால், சட்டம்-ஒழுங்குப் பிரச்சனை ஏற்படாத வண்ணம் கூடுதல் போலீசார் பாதுகாப்புப் பணியில் ஈடுபடுத்தப்பட்டுள்ளனர். இந்தச் சம்பவத்தால் மதுரை கள்ளந்திரி பகுதியில் தற்பொழுது பெரும் பரபரப்பும் பதற்றமும் நிலவி வருகிறது.