பாலியல் வழக்கில் கைதாகி நீக்கப்பட்ட தவெக பிரமுகர் அரசு விழாவில் பங்கேற்றதால் பரபரப்பு!

சென்னை ஆலந்தூரில் கணவனை இழந்த பெண்ணுக்கு நள்ளிரவில் பாலியல் தொல்லை கொடுத்த புகாரில் சிக்கி, தவெக கட்சியிலிருந்து நீக்கப்பட்ட முன்னாள் நிர்வாகி, ஆளுங்கட்சி எம்.எல்.ஏ-வுடன் சகஜமாக அரசு நிகழ்ச்சியில் வலம் வந்தது அப்பகுதியில் பெரும் அரசியல் சர்ச்சையையும் பொதுமக்களிடையே சலசலப்பையும் ஏற்படுத்தியுள்ளது.

சென்னை ஆலந்தூர் பகுதியில் நேற்று அரசுத் துறைகள் சார்பில் பொதுமக்கள் குறைதீர்க்கும் முகாம் நடைபெற்றது. பல்வேறு துறைகளைச் சேர்ந்த அரசு அதிகாரிகள் பங்கேற்ற இந்நீதிமன்ற முகாமிற்கு, ஆலந்தூர் சட்டமன்றத் தொகுதி தவெக எம்.எல்.ஏ ஹரீஸ் நேரில் வந்து பொதுமக்களிடம் இருந்து கோரிக்கை மனுக்களைப் பெற்றுக் கொண்டிருந்தார்.

அப்போது, கடந்த மாதம் பாலியல் வழக்கில் கைதாகி அண்மையில் ஜாமீனில் வெளிவந்த தவெக-வின் முன்னாள் ஆலந்தூர் வடக்கு பகுதி செயலாளர் வேம்புலி, எம்.எல்.ஏ ஹரீசுடன் மிக நெருக்கமாக மேடையிலும் மக்கள் மத்தியிலும் வலம் வந்துள்ளார். கட்சியை விட்டு நீக்கப்பட்ட ஒரு குற்றவழக்குத் குற்றவாளிக்கு அரசு விழாவில் முக்கியத்துவம் தரப்பட்டது அங்கிருந்தவர்களிடையே அதிர்ச்சியை ஏற்படுத்தியது.

ஆலந்தூர் மாதவபுரம் பகுதியைச் சேர்ந்த கணவனை இழந்த பெண் ஒருவர், அங்குள்ள உடற்பயிற்சி மையம் ஒன்றில் பொறுப்பாளராகப் பணியாற்றி வருகிறார். அப்பகுதியின் தவெக செயலாளராக இருந்த வேம்புலி, அந்தப் பெண்ணின் செல்போனுக்குத் தொடர்ந்து ஆபாசக் குறுஞ்செய்திகளை அனுப்பித் தொல்லை கொடுத்து வந்துள்ளார். மேலும், "தற்போது தமிழ்நாட்டில் தவெக ஆட்சி அமைந்துவிட்டது; நான் நினைத்தால் உன்னை வேலையிலிருந்து தூக்க முடியும். வேலை நீக்கம் செய்யாமல் இருக்க நான் சொல்வதைக் கேள்" என மிரட்டியுள்ளார்.

கடந்த மாதம் ஒரு நாள் நள்ளிரவில் அந்தப் பெண் வீட்டில் தனியாக இருந்ததை அறிந்து, வீட்டிற்குள் அத்துமீறி நுழைந்து பாலியல் வன்கொடுமை செய்ய முயன்றுள்ளார். அப்பெண் சத்தமிடவே அங்கிருந்து வேம்புலி தப்பியோடினார். பாதிக்கப்பட்ட பெண் அளித்த புகாரின் பேரில் இரண்டு பிரிவுகளின் கீழ் வழக்குப் பதிவு செய்த போலீசார், வேம்புலியைக் கைது செய்து சிறையிலடைத்தனர். இச்சம்பவம் தெரிந்தவுடனேயே தவெக தலைமை வேம்புலியைச் தற்காலிகமாகப் பொறுப்பிலிருந்தும், கட்சியிலிருந்தும் நீக்கி உத்தரவிட்டது குறிப்பிடத்தக்கது.

கட்சியிலிருந்து நீக்கப்பட்ட நபர் அரசு விழாவில் வலம் வந்தது ஒருபுறமிருக்க, தவெக நிர்வாகிகளின் அண்மைக்கால செயல்பாடுகள் சமூக ஆர்வலர்கள் மத்தியில் கடுமையான விமரிசனத்திற்கு உள்ளாகி வருகின்றன. மக்கள் பிரதிநிதிகளைத் தவிர்த்து, சாதாரணக் கட்சி நிர்வாகிகள் யாரும் மருத்துவமனைகள் அல்லது அரசு அலுவலகங்களுக்குள் நுழைந்து ஆய்வு என்ற பெயரில் அத்துமீறக் கூடாது எனத் தவெக தலைமை ஏற்கனவே கடுமையான எச்சரிக்கை விடுத்திருந்தது.

இருப்பினும், தவெக நிர்வாகிகள் சிலர் அரசுப் பள்ளிகளுக்குள் புகுந்து ரீல்ஸ் எடுப்பது, "முதலமைச்சர் விஜய் புகைப்படத்தைத்தான் வகுப்பறையில் மாட்டுவோம்" எனப் பள்ளி மாணவர்களுக்கும் ஆசிரியர்களுக்கும் இடையூறு விளைவிப்பது போன்ற செயல்களில் ஈடுபட்டு வருகின்றனர். இந்த வரிசையில் தற்போது பாலியல் வழக்கில் கைதான நபர் எம்.எல்.ஏ-வுடன் அரசு மேடையில் தோன்றியிருப்பது தவெக-விற்குப் புதிய தலைவலியை ஏற்படுத்தியுள்ளது.