பகீர்... 4 வயது சிறுமிக்கு பாலியல் தொல்லை கொடுத்த பேக்கரி உரிமையாளர்!

தூத்துக்குடி மாவட்டம் விளாத்திகுளம் பகுதியில் பேக்கரி கடை ஒன்று செயல்பட்டு  வருகிறது. இந்தப் பேக்கரி கடையை நடத்தி வரும் உரிமையாளர் அப்பகுதியில் குடியிருந்து வருகிறார். இந்நிலையில் கடைக்கு வந்த 4 வயது சிறுமிக்கு அவர் பாலியல் தொல்லை கொடுத்துள்ளார். பாதிக்கப்பட்ட சிறுமி நடந்த விபரங்களை வீட்டின் பெற்றோருக்குக் கூறி அழுதுள்ளார். இதனைக் கேட்டு  அதிர்ச்சியடைந்த சிறுமியின் குடும்பத்தினர் காவல் நிலையத்தில் புகாரளித்தனர்.

சிறுமியின் தாய் அளித்த புகாரின் பேரில் அனைத்து மகளிர் காவல்துறையினர் உடனடியாகச் செயல்பட்டனர். குற்றம்சாட்டப்பட்ட பேக்கரி உரிமையாளர் மீது போக்சோ சட்டத்தின் கீழ் வழக்குப்பதிவு செய்யப்பட்டது. இதனைத் தொடர்ந்து தலைமறைவாக முயன்ற பேக்கரி உரிமையாளரைக் காவல்துறையினர் அதிரடியாகக் கைது செய்தனர். கைது செய்யப்பட்ட அவரைத் தீவிர விசாரணைக்குப் பின்னர் நீதிமன்றத்தில் ஆஜர்படுத்தினர். நீதிமன்ற உத்தரவின்படி பேக்கரி உரிமையாளரைக் காவல்துறையினர் சிறையில் அடைத்தனர்.

சிறுமிக்கு பாலியல் தொல்லை அளிக்கப்பட்ட சம்பவம் விளாத்திகுளம் பகுதியில் பெரும் பரபரப்பை ஏற்படுத்தியுள்ளது. சிறுமிக்கு மருத்துவப் பரிசோதனைகள் செய்யப்பட்டுத் தேவையான சிகிச்சைகள் அளிக்கப்பட்டு வருகின்றன. குழந்தைகளின் பாதுகாப்பை உறுதி செய்யக் காவல்துறையினர் தொடர் நடவடிக்கைகளை முடுக்கிவிட்டுள்ளனர். குற்றவாளிகள் மீது  கடுமையான சட்ட நடவடிக்கைகள் எடுக்கப்படும் என எச்சரிக்கை விடுக்கப்பட்டுள்ளது.