அமெரிக்க டாலருக்கு நிகரான இந்திய ரூபாய் மதிப்பு வீழ்ச்சி: 67 காசுகள் சரிந்து ரூ. 95.23 ஆக நிறைவு!

உலகளாவிய சந்தையில் அமெரிக்க டாலரின் மதிப்பு தொடர்ந்து வலுவடைந்து வருவது இந்தியப் பொருளாதாரத்தில் தாக்கத்தை ஏற்படுத்தியுள்ளது. இதன் காரணமாக வங்கிகளுக்கு இடையிலான அந்நியச் செலாவணி சந்தையில் இந்திய ரூபாயின் மதிப்பு இன்று கடுமையான வீழ்ச்சியைச் சந்தித்துள்ளது. இன்றைய வர்த்தகத்தின் இறுதியில் டாலருக்கு நிகரான இந்திய ரூபாயின் மதிப்பு 67 காசுகள் வரை சரிந்து ரூ. 95.23 ஆக நிலைபெற்றது.

இன்றைய வர்த்தகத் தொடக்கத்தில் டாலருக்கு நிகரான இந்திய ரூபாயின் மதிப்பு ரூ. 94.67 என்ற அளவில் மெதுவாகத் தொடங்கியது. அதன் பிறகு வர்த்தக நேரத்தின் போது சந்தை நிலவரங்களுக்கு ஏற்ப ரூ. 94.60 முதல் ரூ. 95.29 வரையிலான வரம்பிற்குள் பெரும் ஏற்ற இறக்கத்துடன் காணப்பட்டது. முன்னதாக கடந்த செவ்வாய்க்கிழமை வர்த்தகத்தில் ரூபாயின் மதிப்பு 5 காசுகள் மட்டுமே சரிந்து ரூ. 94.56 ஆக நிறைவடைந்திருந்தது குறிப்பிடத்தக்கது.

சர்வதேச அளவில் நிலவும் பொருளாதாரச் சூழல்களால் அந்நிய முதலீடுகள் இந்தியச் சந்தைகளில் இருந்து தொடர்ந்து வெளியேறி வருகின்றன. இதுவே டாலரின் மதிப்பு அதிகரிக்கவும், இந்திய ரூபாயின் மதிப்பு பலவீனமடையவும் முக்கியக் காரணமாக அமைந்துள்ளதாக அந்நியச் செலாவணி வர்த்தகர்கள் கவலை தெரிவித்துள்ளனர். ரூபாயின் மதிப்பு சரிந்து வருவதால் வரும் நாள்களில் இறக்குமதிப் பொருட்களின் விலை உயரும் அபாயம் ஏற்பட்டுள்ளது.