மழை தீவிரமடையும் நேரத்தில் அதிர்ச்சி... சென்னையில் வானிலை கண்காணிப்பு ரேடார் கருவி பழுது!

தமிழ்நாட்டில் வடகிழக்கு பருவமழை தீவிரமடைந்து வரும் இத்தகைய சூழலில், சென்னையின் முக்கிய வானிலை கண்காணிப்பு மையத்தில் உள்ள ரேடார் கருவி தொழில்நுட்பக் கோளாறு காரணமாகச் செயல்படாமல் முடங்கியுள்ளது. மழைக்காலத்தின் மிக முக்கியமான தருணத்தில் ஏற்பட்டுள்ள இந்தத் திடீர் பழுது, நிகழ்நேர வானிலை நிலவரங்களைக் கண்காணிப்பதில் பெரும் சிக்கலை ஏற்படுத்தியுள்ளது.

வானிலை மாற்றங்களையும் புயல் நகர்வுகளையும் துல்லியமாகக் கணிப்பதில் வானிலை ரேடார் மிக முக்கியப் பங்காற்றுகிறது. நிகழ்நேரத்தில் மழை பெய்யும் பகுதிகளைத் துல்லியமாகக் கண்டறிவது. பெய்து வருவது லேசான மழையா அல்லது கனமழையா என்பதை மதிப்பிடுவது. புயல் எங்கு உருவாகியுள்ளது, அது எந்தத் திசையில் நகர்ந்து கொண்டிருக்கிறது என்பதைக் கண்காணிப்பது. அடுத்த சில நிமிடங்கள் முதல் சில மணி நேரங்களுக்குள் மழை பெய்யக் கூடிய பகுதிகளை முன்கூட்டியே கணிப்பது.

கனமழை மற்றும் வெள்ள அபாயம் ஏற்படக்கூடிய பகுதிகளைக் கண்டறிந்து உரிய எச்சரிக்கைகளை வழங்குவது போன்ற பல்வேறு பணிகளுக்கு இந்த ரேடார் கருவிகளே அடிப்படையாகச் செயல்படுகின்றன. தற்போது பருவமழை தீவிரம் அடைந்துள்ள நேரத்தில், இத்தகைய அத்தியாவசியமான ரேடார் கருவி பழுதுபட்டுள்ளதால் சென்னை மற்றும் அதன் சுற்றுவட்டாரப் பகுதிகளின் துல்லியமான மழை அளவைக் கண்காணிப்பதில் சிரமம் ஏற்பட்டுள்ளது. தொழில்நுட்பக் குழுவினர் கோளாறைச் சரிசெய்யும் தீவிரப் பணிகளில் ஈடுபட்டுள்ளதாகவும், விரைவில் ரேடார் இயல்பு நிலைக்குத் திரும்பும் என்றும் எதிர்பார்க்கப்படுகிறது.