இசை உலகில் பெரும் சோகம் ... பிரபல பாடகி லாரன் பென்னட் 37 வயதில் திடீர் மரணம்!

அமெரிக்காவின் பிரபல எல்.எம்.எப்.ஏ.ஓ. (LMFAO) இசைக்குழுவின் உலகப் புகழ்பெற்ற 2011 ஆம் ஆண்டு ஹிட் பாடலான "பார்ட்டி ராக் ஆன்தம்" (Party Rock Anthem) பாடலில் பாடியதன் மூலம் உலகளவில் பரவலான கவனத்தைப் பெற்ற பிரிட்டிஷ் ஆல்பம் பாடகி லாரன் பென்னட்,   37 வயதில் எதிர்பாராத விதமாகப் பரிதாபமாக உயிரிழந்துள்ளார். இந்த அதிர்ச்சித் துயரச் செய்தியை அவரது முன்னாள் பாப் இசைக்குழுவான ஜி.ஆர்.எல். (G.R.L.) இன் சக பெண் உறுப்பினர்கள் தங்களின் அதிகாரப்பூர்வ சமூக வலைதளப் பக்கத்தில் முறைப்படி பகிர்ந்து தங்களின் ஆழ்ந்த இரங்கலைத் தெரிவித்துள்ளனர். உலகெங்கிலும் உள்ள மில்லியன் கணக்கான இசை ரசிகர்களிடையே இச்செய்தி கடுமையான சோகத்தையும் அதிர்ச்சியையும்   ஏற்படுத்தியுள்ளது.

லாரன் பென்னட்டின் இந்தத் திடீர் மறைவு குறித்து ஜி.ஆர்.எல். குழுவைச் சேர்ந்த எமலின் எஸ்ட்ராடா, நடாஷா ஸ்லேட்டன் மற்றும் பாலா வான் ஓப்பன் ஆகியோர் வெளியிட்டுள்ள கூட்டு அறிக்கையில், "எங்களின் இதயம்  முற்றிலும் உடைந்துவிட்டது, லாரன் பென்னட் எங்களுக்கு எவ்வளவு முக்கியமானவர் என்பதை வார்த்தைகளால் விவரிக்க முடியாது" என்று கண்ணீருடன் குறிப்பிட்டுள்ளனர். மேலும் அவருடன் கழித்த அன்பான மற்றும் மகிழ்ச்சியான தருணங்களை நாங்கள் எப்போதும் நினைவில் வைத்திருப்போம் என்றும், அவரது ஆன்மா பலரின் இதயங்களைத் தொட்டுள்ளது என்றும் அவர்கள் தங்களின் இரங்கல் பதிவில் உருகமாக எழுதியுள்ளனர். அவரது மரணத்திற்கான உண்மையான காரணம் என்ன என்பது    அதிகாரப்பூர்வமாக வெளியிடப்படவில்லை.

கடந்த 2011 ம் ஆண்டில் வெளியான 'பார்ட்டி ராக் ஆன்தம்' பாடலுக்கு முன்பாக 'பாரடைசோ கேர்ள்ஸ்' குழுவில் இருந்த லாரன் பென்னட், அதன் பின்னர் ஜி.ஆர்.எல். பாப் குழுவின் முதன்மைப் பாடகியாகத் திகழ்ந்து 'அக்லி ஹார்ட்' போன்ற பல ஹிட் பாடல்களைப் பாடியுள்ளார். சமீபகாலமாகப் நாட்டுப்புற (கண்ட்ரி) இசை வடிவங்களில் தாராளமாகப் கவனம் செலுத்தி வந்த இவருக்கு, பிரபல நடனக் கலைஞர் கென்னி வார்மால்டுடன் 6 வயதில் ஹார்லோ என்ற ஒரு பெண் குழந்தை உள்ளார் என்பது குறிப்பிடத்தக்கது. மிகச் சிறிய வயதிலேயே உலகப் புகழ்பெற்ற இசை நட்சத்திரமான லாரன் பென்னட் உயிரிழந்த இந்தத் துயரச் சம்பவம் ஒட்டுமொத்த ஹாலிவுட் இசை உலகிலும்  பெரும் சோக அலையை ஏற்படுத்தியுள்ளது.